काठमाडौं । उखु किसानहरूले तेस्रो दिन मंगलबार पनि काठमाडौंमा प्रदर्शन गरेका छन् । सरकारले निर्धारण गरेको अनुदान रकम उपलब्ध गराउन माग गर्दै उनीहरूले मंगलबार पनि प्रदर्शन गरेका हुन् ।
सरकारले किसानलाई दिँदै आएको अनुदान रकम प्रतिक्विन्टल ७० रुपैयाँबाट आधा घटाएर ३५ रुपैयाँमा झार्ने निर्णय गरेपछि उखु किसान आन्दोलित भएका हुन् ।
उनीहरुको आन्दोलनमा नेकपा एकीकृत समावादीका अध्यक्ष माधवकुमार नेपाल, पूर्वप्रधानमन्त्री डा. बाबुराम भट्टराई, नेकपा माओवादी केन्द्रका वरिष्ठ उपाध्यक्ष नारायणकाजी श्रेष्ठलेसमेत मंगलबार माइतीघर पुगेर ऐक्यवद्धता जनाएका थिए ।
ऐक्यवद्धता जनाउन पुगेका एकीकृत समाजवादीका अध्यक्ष माधवकुमार नेपालले सिंगो देशको कृषि क्षेत्रलाई अगाडि बढाउने हो भने यो क्षेत्रमा राज्यले विशेष ध्यान दिनुपर्ने बताए ।
उनले भने, ‘समस्या उखु किसानको मात्रै होइन्, सिंगो देशको कृषि क्षेत्रलाई अगाडि बढाउने हो भने यो क्षेत्रमा राज्यले विशेष ध्यान दिनुपर्छ ।’
त्यत्स्तै पूर्वप्रधानमन्त्री डा.बाबुराम भट्टराईले पनि झण्डै दुइ तिहाई जनसंख्या किसानहरुले बगाएको पसिनामा आधारित भएपनि किसानहरु अपहेलित भएको भन्दै क्रान्ति, परिवर्तन, लोकतन्त्रको नाममा ठूलो ठगी भइरहेको बताए ।
नेकपा माओवादी केन्द्रका वरिष्ठ उपाध्यक्ष नारायणकाजी श्रेष्ठले उखु किसान यसरी सडकमा आउनुपर्ने बाध्यात्मक अवस्था सिर्जना भएकोप्रति दुःख व्यक्त गर्दै उनीहरुको जायज मागलाई छिटोभन्दा छिटो पूरा गर्न सरकारसँग माग गरे । उखु उत्पादक महासंघको नेतृत्वमा उनीहरूले काठमाडौं केन्द्रित आन्दोलनलाई जारी राखेका हुन् ।
