काठमाडौं । संसदको राज्य व्यवस्था तथा सुशासन समितिको सभापतिमा ईश्वरीदेवी न्यौपानेले उम्मेदवारी दर्ता गराएकी छिन् ।
संसदीय सुनुवाइ समितिको सभापतिबाट राजीनामा दिएर मंगलबार न्यौपानेले राज्य व्यवस्था समितिको सभापतिमा उम्मेदवारी दर्ता गराएकी हुन् ।
उनले आजै सुनुवाइ समितिको सभापतिबाट राजीनामा दिएकी थिइन् । उनको उम्मेदवारीमा प्रस्तावका कांग्रेस सांसद रामहरि खतिवडा र समर्थक एमाले सांसद कृष्णगोपाल श्रेष्ठ छन् ।
निजामती विधेयकमा कुलिङ पिरियड सम्बन्धी विवादमा परेपछि सभापति पदबाट रामहरि खतिवडाले साउन २८ गते राजीनामा दिएका थिए ।
कांग्रेस सभापति शेरबहादुर देउवा निवासमा आज बिहान बसेको पदाधिकारी बैठकले न्यौपानेलाई राज्यव्यवस्था समितिमा पठाउने निर्णय गरेको थियो । समिति सभापतिको निर्वाचन बुधबार दिउँसो ३ बजे समितिको बैठकमै हुने कार्यतालिका सङ्घीय संसद् सचिवालयले सोमबार नै सार्वजनिक गरेको छ ।
