काठमाडौं । स्वतन्त्र उर्जा उद्यमीहरुको संस्था नेपाल (इप्पान) ले ‘टेक एण्ड पे’को प्रावधान बजेटबाट हटाएकोमा सरकारलाई धन्यावाद दिएको छ । इप्पानले बिहीबार काठमाडौंमा पत्रकार सम्मेलन गरी सरकारलाई धन्यवाद दिएको हो ।
सरकारले आगामी आर्थिक वर्ष २०८२/८३ को बजेटमार्फत रनअफ दी रिभर (आरओआर) प्रकृतिका जलविद्युत परियोजनामा ‘टेक एण्ड पे’ विधिमार्फत विद्युत खरिद सम्झौता गर्ने घोषणा गरेको थियो ।
पहिल्यैदेखि कायम रहेको टेक अर पे पीपीएको मोडललाई हटाएर उर्जा उद्यमीलाई संकट तर्फ लैजान खोजेको भन्दै इप्पानले सरकारको उक्त कदमको विरोध गर्दै आएको थियो ।
‘टेक एण्ड पे’ को प्रावधान लागु भएको खण्डमा बैंक तथा वित्तीय संस्थाहरुले कुनैपनि जलविद्युत परियोजनामा लगानी नगर्ने भन्दै निर्माणको विभिन्न चरणमा रहेका १७ हजार ११७ मेगावाट क्षमताका जलविद्युत आयोजनाको भविष्य संकटमा परेको इप्पानको भनाई थियो । ती आयोजनाहरुमा निजी क्षेत्रको करिब १ खर्ब ९ अर्ब रुपैयाँ लगानी भइसकेको अवस्था थियो ।
इप्पानले विभिन्न आन्दोलनका कार्यक्रमहरु घोषणा गरी शान्तिपुर्ण आन्दोलन गर्दै आएको अवस्थामा सरकारले असार ११ मा प्रतिनिधिसभा बैठकमार्फत उक्त निर्णय फिर्ता लिएको थियो ।
