क्यानडा । क्यानाडामा जारी जी–७ शिखर सम्मेलनका क्रममा जर्मनीका चान्सलर फ्रेडरिक मर्जले जर्मन सञ्चारमाध्यमसँग कुरा गर्दै इरानविरुद्धको सैन्य अभियानमा जर्मनीको इजरायललाई बलियो समर्थन रहेको बताएका छन् ।
’इजरायलले यो ‘फोहोरी काम’ हामी सबैका लागि गरिरहेको हो,’ जेडडीएफ प्रसारणकर्तालाई दिएको अन्तर्वार्तामा मर्जले युद्ध अलोकप्रिय भएपनि यसको सामना गर्नुको विकल्प नभएको सङ्केत गर्दै भने ।
“हामी पनि इरानी शासनको सिकार भएका छौँ । यो मुल्ला शासनले विश्वमा मृत्यु र विनाश ल्याएको छ,“उनले भने ।
वेल्ट टिभीसँगको अर्को अन्तर्वार्तामा मर्जले इरानमाथि इजरायलको आक्रमणले इस्लामिक गणतन्त्रको नेतृत्वको पतन हुन सक्ने पनि बताए ।
“मलाई लाग्छ, पछिल्ला केही दिनका आक्रमणहरूले मुल्ला शासनलाई निकै कमजोर बनाइसकेको छ र यो आफ्नो पुरानो शक्तिमा फर्कने सम्भावना छैन, जसले इरानको भविष्य अनिश्चित बनाएको छ,“ मर्जले भने ।
उनले भने, “इमान्दारीका साथ भन्ने हो भने मुल्ला शासन पुरानै अवस्थामा फर्कने कल्पना पनि गर्न सक्दिनँ ।”
इरानविरुद्धको सैन्य अभियानमा संयुक्त राज्य अमेरिका संलग्न हुन सक्छ कि भन्ने प्रश्नमा मर्जले अमेरिकी सरकारको तर्फबाट अहिलेसम्म कुनै निर्णय नभएको बताए ।
उनले भने, “अहिले मुल्ला शासन (इरानी इस्लाम शासक) वार्ताको टेबुलमा फर्कन कत्तिको तयार छ भन्नेमा अमेरिकी संलग्नता हुने वा नहुने भन्ने धेरै हदसम्म निर्भर गर्दछ । यदि इरानी शासक वार्ताका लागि तयार नभएमा यस प्रकारका थप विकासहरू हुन सक्छन्।”
इजरायलले आफ्नो शत्रुलाई आणविक हतियार प्राप्त गर्नबाट रोक्नका लागि इरानका विभिन्न स्थानलाई लक्षित गरी शुक्रबार आश्चर्यजनक हवाई अभियान चलाएको थियो ।
प्रधानमन्त्री बेन्जामिन नेतन्याहुले यो अभियानको उद्देश्य व्यापक हुन सक्ने बताएका छन् ।
