काठमाडौं । नेपाल राष्ट्र बैंकको गभर्नर नियुक्तिका लागि गठन गरिएको सिफारिस समितिबाट पूर्वगभर्नर डा. विजयनाथ भट्टराईले राजीनामा दिएका छन् ।
उनले मंगलबार अर्थमन्त्री विष्णु पौडेलसमक्ष राजीनामा पेश गरेका हुन् । अर्थमन्त्री पौडेलले एकपटक पनि बैठक नबोलाएको भन्दै असन्तुष्टि जनाउँदै भट्टराईले राजीनामा दिएका हुन् ।
नेपाल राष्ट्र बैंकको गभर्नर नियुक्ति सिफारिसका लागि सरकारले चैत ११ गते तीन सदस्यीय समिति गठन गरेको थियो ।
अर्थमन्त्री पौडेलको संयोजकत्वमा अर्थविद् विश्व पौडेल र पूर्वगभर्नर विजयनाथ भट्टराई सदस्य रहेका थिए । समितिले नयाँ गभर्नरको नाम सरकारलाई सिफारिस गर्नुपर्ने व्यवस्था छ ।
समितिले एक जना डेपुटी गभर्नरलाई राखेर तीन जनाको नाम मन्त्रिपरिषदमा सिफारिस गर्ने र ती नाममध्येबाट सरकारले एक जनालाई गभर्नर नियुक्त गर्ने कानुनी व्यवस्था छ ।
सत्तारुढ दुई दल नेकपा एमाले र नेपाली कांग्रेसबीच गभर्नरका विषयमा सहमति जुटिसकेको भए पनि समितिले नाम सिफारिस गरेको छैन भने त्यसअघि नै सर्वोच्च अदालतमा मुद्दा परेको छ ।
राष्ट्र बैंकका कार्यकारी निर्देशक गुणाकर भट्टलाई गभर्नर बनाउन लागिएको भन्दै सर्वोच्च अदालतमा पुरक निवेदन परेपछि गभर्नर नियुक्ति विवादित बनेको छ ।
