एजेन्सी । इन्डियन प्रिमियर लिग(आईपीएल)मा पञ्जाव किंग्सले लगातार दोस्रो जित निकालेको छ । मंगलबार राति भएको खेलमा लखनउ सुपर किंग्सलाई ८ विकेटले हराउँदै पञ्जावले आफ्नो उत्कृष्ट लयलाई निरन्तरता दिएको हो ।
जितको लागि १ सय ७२ रनको विजयी लक्ष्य पछ्याएको पञ्जावले १६.२ ओभरमा दुई विकेटको क्षतिमा १ सय ७७ रन बनाउँदै लक्ष्य भेट्टाएको हो । पञ्जावलाई जित दिलाउन प्रभासिम्रन सिंह र कप्तान श्रेयस आयरले अर्धसतक पूरा गरे । सिंहले ३४ बलमा ९ चौका र ३ छक्काको मद्दतमा ६९ रन बनाउँदा आयरले ३० बलमा ४ छक्का र ३ चौकाको सहयोगमा ५३ रन बनाए । यस्तै नेहाल वाधेराले ४३ र प्रियांश आर्याले ८ रनको योगदान गरे ।
लखनउको लागि दिग्वेश राथीले ४ ओभरमा ३० रन खर्चिंदै दुई विकेट लिए ।
यसअघि लखनउमा भएको खेलमा टस हारेर पहिले ब्याटिङको निम्तो पाएको लखनउले निर्धारित २० ओभरमा ७ विकेटको क्षतिमा १ सय ७१ रन बनाएको थियो । लखनउको लागि निकोलाश पोरानले ४४, आयुष बाडोनीले ४१, एडिन मार्क्रमले २८, अब्दुल समदले २७, र डेभिड मिल्नरले १९ रन बनाए ।
पञ्जावको लागि अर्श्दिप सिंहले तीन विकेट लिंदा लकी फेर्गुसन, ग्लेन म्याक्सवेल, मारको जेन्सन र युज्वेन्द्र चहालले समान एक/एक विकेट लिए ।
जितसँगै दुई खेलबाट ४ अंक जोडेको पञ्जाव दोस्रो स्थानमा उक्लिएको छ भने एक खेल बढि खेल्दै दुई अंक जोडेको लखनउ छैटौं स्थानमा रहेको छ ।
