काठमाडौं । नेपाली कांग्रेसका सभापति शेरबहादुर देउवाले अमेरिकी सहयोग परियोजना(एमसीसी) राम्रो रहेको कुरा अहिले आएर सबैले बुझेको बताएका छन् ।
बुधबार नेपालमा वैदेशिक सहयोगको अर्थ राजनीति विषयक कार्यक्रममा सभापति देउवाले एमसीसी पास गर्ने बेलामा धेरै विरोध भएपनि अहिले आएर सबैले त्यो साँच्चिकै नै राम्रो छ भन्ने लागेको बताएका हुन् ।
उनले भने, ‘एमसीसी प्रतिनिधिसभाबाट पारित गर्ने क्रममा धेरै विरोधहरु भए । तर अहिले आएर सबैले साच्चिकै राम्रो रहेछ यो एमसीसी भनेर बुझेका छन् । यो ग्रान्टमा आएको हो, ऋणमा आएको होइन । त्यसले अहिले फाइदा गरिरहेको छ भन्नेकुरा सबैले देखे ।’
सभापति देउवाले व्यापार गर्ने र उद्योग खोल्ने काम सरकारको नभएको भन्दै व्यापार व्यापारीले र उद्योग उद्योगपतिले नै खोल्ने बताए ।
कार्यक्रममा पार्टीका महामन्त्री विश्वप्रकाश शर्माले उत्तर दक्षिण मित्र राष्ट्रहरुसँगको उन्नतिसँग लाभान्वित हुनुपर्ने र विकास निर्माणमा भइरहेको ढिलाई बारे गहन रुपमा छलफल गर्नुपर्ने बताए ।
