काठमाडौँ । राष्ट्रिय स्वतन्त्र पार्टी (रास्वपा)का उपसभापति डा. स्वर्णिम वाग्लेले सरकार रवि लामिछानेलाई सिध्याउने खेलमा लागेका आरोप लगाएका छन् ।
सहकारी ठगीमा पक्राउ परेका पार्टी सभापति लामिछानेलाई हिरासतमुक्त गराउन बालुवाटार भएको विरोध प्रदर्शनमा उनले सरकार दल फुटाउने विधेयक ल्याएर साना दल फुटाउने र लामिछानेलाई सिध्याउने रणनीतिमा लागिपरेको आरोप लगाएका हुन् ।
उनले स्वतन्त्र छानबिन आयोग बनाएर सबै भ्रष्टहरुको छानबिन आफूहरुले गर्ने दाबी गरे । उनले अरु सहकारी ठगीको आरोपीहरुलाई सरकारले बचाइराख्दा रविलाई हिरासतमा राख्नु कुनै औचित्य नरहेको बताए ।
उनले भने, ‘नेपाली कांग्रेसका उपसभापति धनराज गुरूङ र ऋषिकेश पोखरेल जस्तालाई पनि आरोप लागेको छ । तर सरकारले उनीहरुलाई बचाइराखेको छ । जीबी राईका सल्लाहकार आज राष्ट्रपतिका सल्लाहकार छन् । उहाँहरूलाई चाहिँ उन्मुक्ति दिने, स्वतन्त्र हिड्न दिने तर रविलाई हिरासतमा राख्नु औचित्य छैन । अभिलम्ब उहाँ रिहा हुनुपर्छ ।’
