बीबीसी । टिकटकले अमेरिकी अदालतमा अमेरिकाले लागू गर्न खोजेको टिकटकमाथि प्रतिबन्ध लगाउन सक्ने एउटा कानुनले ‘वाक् स्वतन्त्रतालाई धरमर पार्ने’ तर्क गरेको छ । टिकटकले अदालतमा त्यस्तो तर्क गरेको हो ।
आफ्नो माउ कम्पनी बाइटड्यान्स अमेरिकी कम्पनीलाई उक्त सामाजिक सञ्जाल एप बिक्री गर्नुपर्ने अन्यथा उसले अमेरिकामा प्रतिबन्ध खेप्ने प्रावधान भएको कानुनविरुद्ध टिकटक अदालत गएको हो ।
अमेरिकाले प्रयोगकर्ताको डेटा चीनको सरकारी संयन्त्रमा पुग्ने र त्यसलाई उसले दुरुपयोग गर्न सक्ने भन्दै त्यो कानुन ल्याएको थियो । यद्यपि टिकटक र बाइटड्यान्सले बारम्बार चिनियाँ अधिकारीसँग डेटाको पहुँच नहुने बताउँदै आएका छन् र त्यस्तो आरोपलाई अस्वीकार गरेका छन् ।
ती कम्पनीहरूले गत मे महिनाको सुरुमा उक्त कानुनलाई रोक्न भन्दै मुद्दा दायर गरेका हुन् । उक्त कानुनलाई उनीहरूले गैरसंवैधानिक भनेका छन् र १७ करोड अमेरिकी प्रयोगकर्ताहरूको वाक् स्वतन्त्रताको हनन् हुने दाबी गरेका छन् ।
वाशिङ्टन डीसीस्थित एक अदालतमा तीन न्यायाधीशको इजलासले सोमबार टिकटकका तर्कहरू सुनेको छ । टिकटक र बाइटड्यान्सका वकिल एन्ड्रयू पिङ्कसले अदालतमा यो कानुनले भविष्यमा हुने अनिश्चित जोखिमसहित वाक् स्वतन्त्रतामा असाधारण प्रतिबन्ध लगाएको दाबी गरेका छन् ।
उनले उक्त कम्पनी चिनियाँ राज्यको स्वामित्वमा नभएको बताए । तर न्यायाधीश श्री श्रीनिवासनले कम्पनी ‘चिनियाँ नियन्त्रणमा’ रहेको प्रतिक्रिया दिएका छन् । टिकटकका वकिलले अमेरिकी सरकारले अहिलेको अवस्थामा कुनै पनि दोष नदेखाएको र भविष्यमा समस्या निम्तिन सक्छन् भन्ने ठानेर उक्त कम्पनीलाई दण्डित गरिएको दाबी गरे ।
न्यायाधीश गिन्सबर्गले उक्त कानुनले कम्पनी ‘नियन्त्रणको वर्तमान व्यवस्थामा मात्र रोक लगाएको तर कम्पनीलाई नै रोक नलगाएको’ तर्क गरे । उनले उक्त कानुन अमेरिकासँग सौहार्द सम्बन्ध नभएका देशहरूबाट लगानी भएका सबै कम्पनीलाई लागु हुने र त्यो टिकटकका लागि मात्र नभएको बताए ।
