भक्तपुर । प्रधानमन्त्री पुष्पकमल दाहाल प्रचण्डे सामाजिक संजाल टिकटकमाथिको प्रतिबन्धको निर्णय सामाजिक सद्भाव बचाउने उद्देश्यले गरिएको बताएका छन् । नेपाल संवत् ११४४ को अवसरमा मंगलबार भक्तपुरको ठिमीमा आयोजित कार्यक्रमलाई सम्बोधन गर्दै प्रधानमन्त्रीले सबैदलको सहमतिमा टिकटक बन्द गरिएको दाबी गरे ।
उनले कतिपयका असहमति देखिएपनि दलहरुबीच व्यापक छलफल गरेर सहमतिमै निर्णय भएको बताए । उनले भने, ‘देशभित्रका सबै राजनीतिक दलसँगको लामो बहसको सहमतिपछि र अन्तराष्ट्रिय रुपमा पनि सबैभन्दा लोकतान्त्रिक देशको मान्यता अध्ययन गरेर सामाजिक सद्भाव पारिवारिक एकतालाई खलबल पार्नबाट बचाउने उद्देश्यले टिकटक बन्द गरेका हौं । यो बहस त हुँदै जाला । यसमा विमतिहरु पनि होलान् ।’
उनले अराजकता रोक्ने विषयमा सरकार खरो उत्रने बताए । त्यस्तै उनले राष्ट्रिय विभूति शंखधर साख्वाले सामाजिक रुपान्तरणका लागि खेलेको भूमिकाको प्रशंसा गरे ।
