काठमाडौं । मार्च ८ गते अन्तराष्ट्रिय नारी दिवसको अवसरमा महिलाहरुले सहिद स्मारक ए डिभिजन लिगका खेलहरु साधारण प्याराफिटतर्फ निशुल्क हेर्न पाउने भएका छन् । लिगको मार्केटिङ तथा टिकेटिङको अधिकार पाएको एमडीएसीले विज्ञप्ति जारी गर्दै बुधबार नारी दिवसको अवसरमा महिलाले लिगका खेल निशुल्क हेर्न पाउने जनाएको हो ।
भोलि बुधबार लिगमा तीन खेल हुँदैछ । भोलि हुने पहिलो खेलमा विभागीय टोली नेपाल पुलिस क्लबले हिमालयन शेर्पाको सामना गर्नेछ । खेल दशरथ रंगशालामा दिउँसो साढे २ बजे शुरु हुनेछ । सोहि समयमा च्यासल स्टेडियममा नेपाल एपीएफ क्लब र सातदोबाटो युथ क्लब भिड्नेछन् । यस्तै दशरथ रंगशाला बेलुकी साढे ५ बजे हुने दिनको तेस्रो तथा अन्तिम खेल मनांङ मर्स्याङ्दी क्लबले संकटा क्लबको सामना गर्नेछ ।
