काठमाडौँ । क्यानडाको ब्रिटिश कोलम्बिया प्रान्त सरकारले मे महिनाको २९ तारिखलाई ‘नेपाल हेरिटेज डे’ को मान्यता दिएको छ ।
तेन्जिङ नोर्गे शेर्पा र एड्मन्ड हिलारीले सगरमाथा आरोहण गरेको दिन मे २९ तारिखलाई क्यानडाको ब्रिटिश कोलम्बिया प्रान्त सरकारले ‘नेपाल हेरिटेज डे’को मान्यता दिएको हो ।
लेफ्टिनेन्ट गभर्नर वेन्डी कोकियाद्वारा जारी घोषणामा नेपाली समुदायले प्रान्तको सामाजिक, आर्थिक, राजनीतिक तथा सांस्कृतिक विकासमा पुर्याएको योगदानको उच्च प्रशंसा गरिएको छ ।
घोषणामा ब्रिटिश कोलम्बियालाई सांस्कृतिक, जातीय, नस्लीय र धार्मिक रूपमा विविध प्रान्तका रूपमा उल्लेख गर्दै नेपाली मूलका नागरिकहरूले यस विविधतालाई अझ समृद्ध बनाएको जनाइएको छ ।
साथै मे २९ को ऐतिहासिक महत्वलाई स्मरण गराउँदै सन् १९५३ मा नेपाली नागरिक तेन्जिङ नोर्गे शेर्पाले सर एडमन्ड हिलारीसँगै सगरमाथाको पहिलो सफल आरोहण गरेको घटनालाई साहस, एकता र हिमाली विरासतको प्रतीकका रूपमा प्रस्तुत गरिएको छ ।
यसले नेपाली मूलका समुदायको समृद्ध संस्कृति र इतिहासबारे बुझ्ने अवसर प्रदान गर्नुका साथै उनीहरूले ब्रिटिश कोलम्बियामा पुर्याएका योगदानलाई सम्मान र उत्सवका रूपमा मनाउने उद्देश्य राखेको बताइएको छ।
