कर्णाली । अपाङ्गता अधिकार र सचेतना बिस्तारका लागि सुर्खेतमा ह्विलचियर बास्केटबल खेल सम्पन्न भएको छ । ३४औँ अन्तरराष्ट्रिय अपाङ्गता दिवसका अवसरमा स्पाइनल इन्जुरी युनियनले सेभ द चिल्ड्रेन र भिजन ३६० को सहयोगमा कर्णाली र सुदूरपश्चिम प्रदेशका खेलाडीहरुबीच मैत्रीपूर्ण ह्विलचेयर बास्केटबल खेल आयोजना गरेको हो ।
खेलमा कर्णाली प्रदेशका तर्फबाट स्पाइनल इञ्जुरी युनियन र सुदूरपश्चिम प्रदेशका तर्फबाट एपी इन्क्लुसिभ पारा एथलेटिक्स स्पोर्टस क्लब सहभागी भएका थिए ।
युनियनका संयोजक दिव्या खड्काका अनुसार खेलमार्फत अपाङ्गता भएका व्यक्तिहरू आत्मविश्वासी, सक्षम, सम्मानजनक तथा सक्रिय जीवन जिउन सक्षम छन् भन्ने सन्देश दिन खोजिएको बताइन् । उनले भनिन्, “हामीलाई आवश्यक पर्ने कुरा भनेको समावेशी र लाञ्छना–मुक्त समाज निर्माणका लागि समुदाय र सरकारको अझ बलियो समर्थन र सहकार्य हो ।”
सेभ द चिल्ड्रेनको सिफ्ट अभियानअन्तर्गत यस समूहले संवाद, कथावाचन र आर्टिभिजनलाई प्रवर्द्धन गर्न तथा अपाङ्गता अधिकार र सचेतना बिस्तार गर्न ह्विलचेयर बास्केटबललाई माध्यमका रूपमा प्रयोग गर्दै आएको उक्त संस्थाका पैरवी र सञ्चार निर्देशक आयुष जोशीले बताइन् । उनले ह्विलचेयर बास्केटबल खेल अपाङ्गता भएका व्यक्तिहरूले भोग्दै आएका लाञ्छना र भेदभावलाई चुनौती दिने एक सृजनशील र प्रभावकारी माध्यम भएको बताइन् ।
कार्यक्रममा कर्णाली प्रदेशका सामाजिक विकासमन्त्री घनश्याम भण्डारीले अपाङ्गता समावेशीकरण एक दिनको विषय नभएको धारणा राखे । उनले भने, “कर्णाली प्रदेश सरकारका तर्फबाट म अपाङ्गता भएका व्यक्तिहरूले समावेशी सेवामा पहुँच पाउन सक्ने वातावरण निर्माण गर्ने पूर्ण प्रतिबद्धता दोहो¥याउँछु । हामी चेतनामूलक गतिविधि प्रवर्द्धन गर्न र अपाङ्गता अधिकारलाई अगाडि बढाउन निरन्तर काम गर्दै जानेछौँ ।”
