बीबीसी । अमेरिकी राष्ट्रपति डोनाल्ड ट्रम्पले बीबीसीको पानोरामा कार्यक्रमले आफ्नो भाषणलाई ‘भ्रामक तरिकाले’ सम्पादन गरेको भन्दै संस्थामाथि कानुनी कारबाही गर्ने घोषणा गरेका छन् ।
बीबीसीले सम्पादनबाट ६ जनवरी २०२१ को भाषणमा ट्रम्पले हिंसात्मक कार्यका लागि प्रत्यक्ष आह्वान गरेको जस्तो गलत बुझाइ भएको स्वीकार गर्दै क्षमा मागे पनि आर्थिक क्षतिपूर्ति दिन अस्वीकार गरेको थियो ।
शुक्रबार साँझ एयर फोर्स वनमा सञ्चारकर्मीसँग कुरा गर्दै ट्रम्पले भने, ‘हामी उनीहरूलाई करिब १ अर्बदेखि ५ अर्ब डलरसम्मको दाबीसहित सम्भवतः अर्को हप्ताभित्र मुद्दा हाल्नेछौँ।’
बीबीसीले उक्त सम्पादन अनिच्छायुक्त रूपमा भएको बताए पनि ट्रम्पले संस्थाले ‘धोका दिएको’ र ‘आफूले बोलेका शब्दहरू परिवर्तन गरिएको’ आरोप लगाए।
विवाद चर्किएपछि बीबीसीका निर्देशक जनरल टिम डेभी र समाचार प्रमुख डेबराह टर्नेसले राजीनामा दिइसकेका छन् ।
यसअघि ट्रम्पका वकिलहरूले बीबीसीलाई एक अर्ब डलर क्षतिपूर्ति तिर्न, सामग्री फिर्ता लिन र क्षमा माग्न अल्टिमेटम दिएका थिए।
तर सार्वजनिक अदालत रेकर्डका खोजीमा अहिलेसम्म कुनै मुद्दा दर्ता भएको देखिएको छैन। मुद्दा पर्न सक्ने सम्भावित फ्लोरिडा राज्यका संघीय तथा राज्य अदालतहरू सप्ताहन्तका लागि बन्द छन् ।
