मनिला । फुङ–वोङ नामाकरण गरिएको सुपर टाइफून आइतबार फिलिपिन्सको पूर्वी समुद्री तटमा ठोक्किएको राष्ट्रिय मौसम विभागले जानकारी गराएको छ । फुङ–वोङका कारण कम्तिमा दुई व्यक्तिको मृत्यु भइसकेको छ भने बढी प्रभावित क्षेत्रका १० लाखभन्दा बढी व्यक्ति सुरक्षित स्थानमा जान बाध्य भएका छन्।
फिलिपिन्सको लगभग सम्पूर्ण दायरामा फैलिएको आँधीले लुजोनको मुख्य टापु अरोरा प्रान्तमा स्थानीय समय अनुसार राति ९ः१० अवतरण गरेको फिलिपिन्सको मौसम पूर्वानुमान् निकायले जनाएको छ।
फङ–वोङले फिलिपिन्सको अधिकांश क्षेत्रमा हावा र भारी वर्षा ल्याउने अपेक्षा गरिएको छ । फिलिपिन्समा गत हप्ता मात्र काल्मेगी नाम दिइएको आँधी आउँदा २२० भन्दा बढीको मृत्यु भएको थियो।
नागरिक सुरक्षा कार्यालयले आँधीका कारण दुई जनाको बाढीमा डुबेर मृत्यु भएको पुष्टि गरेको छ ।
आँधी तीब्र वेगका साथ आउनेछ । आँधीका कारण उत्तरी कागायान प्रान्तको एक उद्धार केन्द्रमा आश्रय लिइरहेका मानिसहरुले बाढीको सामना गर्नुपर्ने डरले घर छोड्न बाध्य भएका अधिकारीले एएफपीलाई बताए ।
राजधानी मनिला सहित लुजोनको मुख्य टापुमा सोमबार विद्यालय र सरकारी कार्यालयहरू बन्द गर्न आदेश दिइएको छ र लगभग ३०० उडानहरू रद्द गरिएको छ।
