तनहुँ । सिँचाइ तथा जलस्रोत व्यवस्थापन आयोजना भानु तनहुँले सिँचाइ तथा पहिरो नियन्त्रणका लागि १५ करोडभन्दा बढीका योजना सञ्चालन गरेको छ । कार्यालयले चालु आर्थिक वर्षमा १५ करोड ७५ लाखका विभिन्न योजना सञ्चालन गरिएको जानकारी दिएको हो ।
आयोजना प्रमुख सुपिन्द्र खत्रीले पाँचवटा ठूला आयोजनामा ३/३ करोड बजेट विनियोजन भएको जानकारी दिए । उनका अनुसार देवघाट गाउँपालिका- ५ स्थित दासढुंगा त्रिशूली नदी बृहत् लिफ्ट सिँचाइ आयोजना, जरायो खोला नहर सिँचाइमा ३ करोड, व्यास नगरपालिका- ६ स्थित सिसाघाट उपत्यका लिफ्ट सिँचाइ आयोजनामा ३ करोड, भानु नगरपालिका- ४ स्थित भानु चुँदी बराह सिँचाइ आयोजनामा ३ करोड, शुक्लागण्डकी नगरपालिकास्थित टार बजार संरक्षण कार्यक्रमका लागि ३ करोड, देवघाट गाउँपालिका-५ स्थित गलेश्वर आश्रम तातोपानी पहिरो नियन्त्रणका लागि ३ करोड बजेट विनियोजन भएको छ ।
यस्तै, मर्स्याङ्दी तथा दरौँदी नदी नियन्त्रणका लागि ७५ लाख बजेट विनियोजन भएको उनले जानकारी दिए । कार्यालयले तनहुँसहित लमजुङ, मनाङ र गोरखामा काम गर्दै आएको छ । सुरुमा पालुङटार सिँचाइ आयोजना तथा कुण्डुटार सिँचाइँ योजनालाई कार्यान्वयनमा ल्याउने उद्देश्यका साथ आर्थिक वर्ष २०७५/७६ मा पालुङटार कुण्डुटार सिँचाइ आयोजनाको नाममा स्थापना भएको थियो ।
आर्थिक वर्ष २०८१/८२ बाट तनहुँ, गोरखा, लमजुङ र मनाङ कार्यक्षेत्र रहनेगरी नाम परिवर्तन गरी सिँचाइ तथा जलस्रोत व्यवस्थापन कार्यालय गोरखा बनाइएको थियो । चालु आर्थिक वर्ष २०८२/८३ मा स्थानान्तरण भई सिँचाइ तथा जलस्रोत व्यवस्थापन आयोजना भानु, तनहुँ भएको छ ।
कार्यालयले चार जिल्लाका विभिन्न सिँचाइ संरचना निर्माण, दरौँदी, दोर्दी तथा मर्स्याङ्दी नदी क्षेत्रमा डुबान तथा कटानबाट प्रभावित वा जोखिमयुक्त स्थानमा तटबन्धन, स्पर तथा रिभेटमेन्ट निर्माण, जग्गा उकास, नदी नियन्त्रण, सिँचाइ तथा नदी व्यवस्थापन कार्यका लागि आवश्यक अध्ययन, सर्वेक्षण कार्य गरिरहेको प्रमुख खत्रीले जानकारी दिए ।
