काठमाडौं । प्रधानमन्त्री केपी ओलीले चीन भ्रमणले नेपालको हित र प्रतिष्ठा माथि उठ्ने बताएका छन् । शुक्रबारको प्रतिनिधिसभा बैठकमा चीन भ्रमणबारे जानकारी गराउँदै प्रधानमन्त्रीले मुलुकको हित विपरीत कुनै सम्झौता नहुने बताएका हुन् ।
उनले भने, ‘नेपालको हित र प्रतिष्ठालाई माथि उठाउने गरी मेरो नेतृत्वमा गएको प्रतिनिधिमण्डलले काम गर्नेछ । त्यसमा विश्वस्त रहन आग्रह गर्छु ।’
प्रधानमन्त्रीले चीनका राष्ट्रपति सी चिनफिङको मैत्रीपूर्ण निमन्त्रणामा नेपाली प्रतिनिधिमण्डलको नेतृत्व गर्दै भदौ १४–१८ सम्म ५ दिने भ्रमणमा जान लागेको बताए । भ्रमणको मूल उद्देश्य चीनको थियानजिन शहरमा आयोजना हुने शाङ्घाई सहयोग संगठनको शिखर सम्मेलनमा भाग लिनु रहेको उनले बताए ।
उनले सांघाई सहयोग संगठन सन् २००१ मा स्थापना गरिएको ठूला क्षेत्रीय संगठनमध्ये एक भएको बताए । उनले भने, ‘नेपाल सन् २०१६ देखि यसको संवाद साझेदार रहँदै आएको छ । यहाँ जानुको उद्देश्य नेपालको स्तर अभिवृद्धि गर्नु, नेपालको दृष्टिकोण र प्राथमिकता स्पष्ट राख्नु र नेपालको हित प्रवद्र्धन गर्नु रहेको छ ।’
चीन भ्रमणमा रहँदा चिनियाँ राष्ट्रपति र उपराष्ट्रपतिसँग आफूले भेटवार्ता गर्ने कार्यक्रम रहेको प्रधानमन्त्रीले जानकारी दिए । सांघाई सहयोग संगठन (एससीओ)को शिखर सम्मेलनमा सहभागी हुन शनिबार नेपाली प्रधानमन्त्री नेतृत्वको प्रतिनिधिमण्डल चीन प्रस्थान गर्दैछ ।
भ्रमण दलमा प्रधानमन्त्री ओलीका साथ प्रथम महिला राधिका शाक्य, शिक्षा, विज्ञान तथा प्रविधिमन्त्री रघुजी पन्त, संस्कृति, पर्यटन तथा नागरिक उड्डयनमन्त्री बद्रीप्रसाद पाण्डे, नेपाली कांग्रेसका सांसद पूर्णबहादुर खड्का, प्रधानमन्त्रीका आर्थिक तथा विकास सल्लाहकार डा. युवराज खतिवडा, नेकपा (एमाले) का सांसद छविलाल विश्वकर्मा र उच्चस्तरीय सरकारी अधिकारीहरू रहनेछन् ।
