काठमाडौं । राष्ट्रिय स्वतन्त्र पार्टीका सांसद गणेश पराजुलीले लिम्पियाधुरा, लिपुलेक र कालापानी नेपालका अभिन्न भूभाग भएको भन्दै राष्ट्रिय हितका मुद्दामा साझा अवधारणा निर्माणको आवश्यकता रहेको बताएका छन् ।
शुक्रबारको प्रतिनिधिसभा बैठकमा सांसद पराजुलीले प्रधानमन्त्रीको आसन्न चीन भ्रमणलाई संकेत गर्दै भ्रमण अघि राष्ट्रियताको सन्दर्भमा साझा धारणा बनाउन आग्रह गरेका हुन् ।
उनले भने, ‘लिम्पियाधुरा, लिपुलेक र कालापानी क्षेत्र नेपालका अभिभाज्य भूभाग हुन् भन्ने विषयमा राष्ट्रिय स्वतन्त्र पार्टी हिमाल झै अटल रहेको छ ।’
सुगौली सन्धि (सन् १८१६) बाट नै नेपालको पश्चिमी सिमा काली नदी रहेको स्पष्ट भइसकेको भन्दै उनले यस विषयमा कुनै विवाद नरहेको बताए।
सांसद पराजुलीले राष्ट्रको स्वाधीनता, सार्वभौमिकता र भौगोलिक अखण्डतामा सम्झौता गर्न नसकिने स्पष्ट पारे। उनले भने, ‘राष्ट्रको प्रत्यक्ष सहमति बिना कुनै पनि सम्झौता वैधानिक हुन सक्दैन। नेपालको सहभागिता र सहमति बिना गरिने कुनै पनि सम्झौता वा गतिविधि राष्ट्रहितविपरीत हुनेछ ।’ उनले सरकारले राष्ट्रहित माथि कुनै सम्झौता नगर्ने प्रतिबद्धता जनाउनुपर्ने पनि माग गरे ।
