काठमाडौं । राष्ट्रिय प्रजातन्त्र पार्टी ले भारत र चीनबीच भएको लिपुलेक सम्झौताबारे सरकारसँग दुवै मुलुकसँग प्रधानमन्त्रीस्तरीय वार्ता गर्न माग गरेको छ ।
प्रतिनिधिसभाको शुक्रबारको बैठकमा राप्रपाका प्रमुख सचेतक ज्ञानेन्द्र शाहीले प्रधानमन्त्री केपी शर्मा ओलीलाई भारत र चीनसँग प्रधानमन्त्रीस्तरीय वार्ता गर्न आग्रह गरेका हुन् ।
उनले भने, ‘प्रधानमन्त्रीज्यू छिमेकी राष्ट्र चीन र भारत भ्रमणमा जाँदै हुनुहुन्छ भन्ने कुरा सुनेको छु । लिपुलेक, लिम्पियाधुरा र कालापानीबारे भारत र चीनसँग प्रधानमन्त्री स्तरीय वार्ता गर्नुपर्छ । र यो वार्ता गर्न हामी अपील गर्दछौँ ।’
शाहीले लिपुलेक–लिम्पियाधुराबारे संयुक्त राष्ट्रसंघमा कुरा उठाउन माग गरेका छन् । उनले भने, ‘यो विषय संयुक्त राष्ट्रसंघमा उठाइयोस् । तर अहिलेको सरकार पोलियो रोग लागेको मान्छे जस्तै रह्यो ।’
