काठमाडौं । लेगस्पिनर सन्दीप लामिछानेले ह्याट्रिकसहित पाँच विकेट लिएपछि अष्ट्रेलिया भ्रमणमा रहेको नेपालले अभ्यास खेलमा जित निकालेको छ । मंगलबार बिहान भएको पहिलो अभ्यास खेलमा नेपालले अष्ट्रेलियन क्यापिटल टेरिटोरी(एसिटी)लाई ४१ रनले पराजित गरेको हो ।
जितको लागि १ सय ७८ रनको विजयी लक्ष्य पछ्याएको एसिटीले १७.२ ओभरमा अलआउट हुँदै १ सय ३६ रनमात्र बनाउन सक्यो । एसीटीका लागि जेक स्मिथले सर्वाधिक ५० तथा जाक केघले २५ रन बनाए ।
एसिटीलाई सस्तैमा समेट्न नेपालको लागो सन्दीप लामिछानेले ४ ओभरमा ह्याट्रिकसहित ३१ रन खर्चेर पाँच विकेट लिए । यस्तै करण केसी, रुपेश सिंह र कुशल भुर्तेलले एक/एक विकेट लिए ।
यसअघि टस हारेर पहिले ब्याटिङमा उत्रिएको नेपालले निर्धारित २० ओभरमा ८ विकेटको क्षतिमा १ सय ७७ रन बनाएको थियो । नेपालको लागि आसिफ शेखले ३९ बलमा सर्वाधिक ६९ रन बनाउँदा रोहित पौडेलले ३६ र आरिफ शेखले २४ रन बनाए ।
नेपालले आजै दोस्रो टी-२० पनि खेल्नेछ भने त्यसपछि २८ र ३० अगस्टमा साउथ अस्ट्रेलियाको टिमसँग पनि २ टी-२० र एक एकदिवसीय खेल खेल्नेछ ।
