काठमाडौं । गत असार २४ गते नेपाल–चीन सीमाको ल्हेन्दे खोलामा आएको बाढीले मितेरी पुल बगाएपछि केरुङमा अलपत्र परेका एकसय ८१ जना नेपालीलाई बुधबार चीन सरकारले तातोपानी नाका हुँदै नेपाल पठाउने भएको छ ।
यसअघि साउन ७ गते २०३ जना नेपालीलाई तातोपानी नाका हुँदै नेपाल पठाएको चीन सरकारले बुधबार थप १८१ जनालाई नेपाल पठाउन लागेको ल्हासास्थित नेपाली महावाणिज्यदूत लक्ष्मीप्रसाद निरौलाले जानकारी दिएका छन् ।
निरौलाकाअनुसार यसरी अलपत्र नेपाली नागरिकहरु मध्ये कतिपयसँग नेपाल जाने भाडा र खानाखर्च समेत नभएको सन्दर्भमा चीनको सिजाङ स्वायत्त क्षेत्रको वैदेशिक मामिला कार्यालयसँगको निरन्तर समन्वय र चीन सरकारका विभन्न निकायहरु समेतको संलग्नतामा उनीहरुलाई चीन सरकारकातर्फबाट तातोपानी सीमानाकासम्म पुर्याइने र त्यहाँबाट नेपाली पक्षले नेपाली नागरिकहरुलाई सुरक्षित तबरले नेपाल लैजाने कार्यक्रम तय भएको छ ।
महावाणिज्यदूत निरौलाले बाढी पीडित नेपाली नागरिकहरुलाई उद्धार गरी सुरक्षित बसोबासको व्यवस्था मिलाउनुका साथै सीमा नाकासम्म लैजाने व्यवस्था मिलाएकोमा चीन सरकारलाई तथा निरन्तरको पहल र प्रयासका लागि नेपाली महावाणिज्यदूतावासलाई निर्देशन र सहजीकरण गर्ने नेपाली अधिकारीहरुलाई धन्यवाद दिएका छन् ।
मितेरी पुल बगाएपछि अहिले रसुवागढी नाका बन्द गरेको छ । चीन सरकारले मितेरी पुल निर्माणको काम सुरु गरिसकेको छ । दसैंअघि रसुवागढी नाका संचालन गर्ने गरी निर्माण कार्य भइरहेको छ ।
यी हुन् केरुङबाट फर्किने नेपाली
