काठमाडौं । नेकपा एमालेमा ७० वर्षको उमेर हद र दुई कार्यकालको व्यवस्था हटाउने निर्णयले तरंग ल्याएको छ । पार्टी अध्यक्ष केपी शर्मा ओली पक्षका नेता यो निर्णयबाट खुसी देखिएका छन् भने पूर्वराष्ट्रपति विद्यादेवी भण्डारी पक्षका नेताहरुले भने त्यसको काउण्टरमा अभिव्यक्ति दिन थालेका छन् । पूर्वराष्ट्रपति भण्डारीलाई नेतृत्वमा आउन नदिने उद्देश्यले ७० वर्षको उमेर हद र दुई कार्यकालको व्यवस्था हटाउने प्रस्ताव बिहीबार बसेको सचिवालय बैठकले अनुमोदन गरेपछि एमालेमा तरंग पैदा भएको हो ।
दुई प्रावधान हटाएपछि एमाले अध्यक्ष ओलीलाई पुनः अध्यक्ष बन्ने बाटो खुल्ने छ । बैठकले यस्तो निर्णय गरेपछि शुक्रबार बिहान एमाले महासचिव शंकर पोखरेलले पार्टीमा विधि निर्माणको अन्यौल अन्त्य भएको बताएका छन् । सामाजिक संजालमार्फत महासचिव पोखरेलले यसबाट मिसन ’८४का लागि बलियो नेतृत्व र एकतावद्ध पार्टी आवश्यक थियो र त्यो सुनिश्चित भएको बताएका हुन् । उनले लेखेका छन्, ‘विधि निर्माणको अन्योल अन्त्य भएको छ । मिसन ’८४का लागि बलियो नेतृत्व र एकतावद्ध पार्टी आवश्यक थियो । त्यो सुनिश्चित भएको छ ।’
तर एमालेका वरिष्ठ उपाध्यक्ष ईश्वर पोखरेलले महासचिव पोखरेलको भनाईलाई काउण्टर दिँदै सचिवालयको निर्णय पोलिटब्युरोले परिमार्जन गर्नुपर्ने बताएका छन् । पोखरेलले समाजिक संजालमा लेखेका छन्, ‘पार्टीको विधान महाधिवेशनमा प्रस्तुत गरिने पार्टी विधानको संशोधन (मस्यौदा) माथि सचिवालयको बैठकमा गम्भीरताका साथ छलफल गरियो । आज पोलिटब्यूरो सदस्यहरूका बीचमा छलफल हुनेछ । पोलिटब्यूरोका सम्पूर्ण कमरेडहरू गंभीरताका साथ छलफल बहसमा सहभागी हुनुहुनेछ र केन्द्रीय कमिटीमा प्रस्तुत हुने प्रस्तावलाई थप परिमार्जन गर्ने कुरामा योगदान पुर्याउनु हुनेछ !’
त्यस्तै एमाले नेतृ उषाकिरण तिम्सेनाले एमालेको दोश्रो पुस्ताले आफूलाई राजनीतिक प्राणी भएको प्रमाणि गर्ने बेला आएको बताएकी छन् । उनले भनेकी छन्, ‘एमालेको दोश्रो पुस्ताले आफूलाई राजनीतिक प्राणी भएको प्रमाणित गर्न ढिला नगर्नु भए राम्रो हुने थियो ।’
विद्या भण्डारीको पक्षमा वकालत गर्दै आएका अर्का नेता कर्णबहादुर थापा आदेशबाट नभई विधिबाट पार्टी सञ्चालन गर्न अन्तर संघर्षलाई सघन बनाउन आग्रह गरेका छन् । थापाले सामाजिक संजालमा लेखेका छन्, ‘लामो समयको बहसबाट पार्टी नेतृत्व र सञ्चालन सम्बन्धि स्थापित लोकतान्त्रिक मान्यता पालना गर्ने कि व्यक्तिको पदिय आकांक्षा पूरा गर्न तोड्ने गम्भीर बहसको सुरूवात भएको छ एमालेको सचिवालयको बैठकमा । कमरेड अध्यक्षको नेतृत्वमा पारित भएका दस्तावेज अगाडि राखेर बहस गरौं । आदेशबाट होइन, विधिबाट पार्टी सञ्चालन गर्न अन्तर संघर्षलाई सघन बनाउ । मर्यादा र सिष्टताका सिमालाई सबैले पालना गरौं ।’
बिहीबार मध्यरातसम्म चलेको एमाले सचिवालय बैठकले ७० वर्षे उमेर हद र दुई कार्यकालको व्यवस्था हटाउने प्रस्ताव पारित गरेको थियो । बैठकमा दोस्रो विधान महाधिवेशनका लागि उपाध्यक्ष विष्णुप्रसाद पौडेलले प्रस्तुत गरेको विधान संशोधनको प्रस्तावलाई अन्तिम रुप दिँदै पार्टी विधान (२०७८ संशोधन) को धारा ६४ मा रहेको ७० वर्ष उमेर हद र दुई कार्यकाल व्यवस्था हटाउने निर्णय भएको थियो । विधान संशोधनको प्रस्तावलाई आज हुने पोलिटब्युरो बैठकमा पेस हुने र उक्त प्रस्ताव केन्द्रीय कमिटीमा लगिने छ ।
बैठकले पदाधिकारीको सङ्ख्या १५ सहित ८४ सदस्यीय पोलिटब्युरो र केन्द्रीय कमिटीमा २५१ सदस्य रहने निर्णय गरेको छ । यही साउन ५ गते केन्द्रीय कमिटी बैठक पनि बस्ने छ भने आगामी भदौ २०, २१ र २२ गते हुने विधान महाधिवेशनले उक्त प्रस्ताव पारित गरेपछि उमेर हद र कार्यकालसम्बन्धी नयाँ प्रावधान लागू हुनेछ । यदि सचिवालय बैठकले अनुमोदन गरेको प्रस्ताव पोलिटब्युरो, केन्द्रीय कमिटी हुँदै विधान महाधिवेशनमा लगेर पारित गर्ने तयारी छ । जसबाट भण्डारीले पार्टीको नेतृत्व वगर्ने चाहना पूरा हुने छैन ।
