काठमाडौं । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले सोमबार प्रतिनिधिसभा बैठकमा सम्बोधन गरेका छन् । सम्बोधनका क्रममा प्रचण्डले सरकारले सुशासन प्रत्याभूति दिलाउन नसकेको उल्लेख गर्दै सरकारप्रति जनताको विश्वास गुम्दै गएको टिप्पणी गरे ।
सरकारका गतिविधिबाट आम जनता मात्र होइन, सत्तारूढ दलकै कार्यकर्तासमेत असन्तुष्ट भएको बताउँदै अध्यक्ष प्रचण्डले भने, ‘यो एक वर्षमा तपाईंले कसको विश्वास जित्नु भयो कुन वर्ग लाभान्वित भयो ? सरकारका गतिविधिले जनविश्वासको गम्भीर प्रश्न खडा गरेको छ ।’
उनले धितोपत्र बोर्ड, भुटानी शरणार्थी काण्ड, जग्गा घोटाला, विद्युत बक्यौता मिनाहा, भूमाफिया संरक्षण, तथा सरुवा–नियुक्तिमा हुने लाखौँका डिलहरूजस्ता घटनाहरूको उदाहरण दिँदै सुशासन कायम गर्न सरकार असफल भएको आरोप लगाए ।
उनले स्टक एक्सचेन्जको नयाँ लाइसेन्स वितरण प्रक्रिया र सुरक्षा निकायको हतियार खरिदजस्ता विषयमा चलखेल भइरहेको उल्लेख गर्दै सरकार पारदर्शिता र मापदण्डअनुसार अघि बढ्न तयार छ कि छैन भन्ने प्रश्न उठाए ।
उनले बजेटका नाममा जनताको सपना होइन, स्वार्थ समूहको सौदाबाजी भएको आरोप लगाए । उनले भने, ‘जब बजेट नै सहभागिताहीन, जब नीतिगत निर्णय नै प्रतिशोधको आधारमा लिइन्छ, तब जनताले के अपेक्षा गर्ने ?’ उनले आत्मनिर्भर अर्थतन्त्रका दृष्टिले महत्त्वपूर्ण मानिएका घरेलु मदिराको व्यवस्थापन र ब्राण्डिङ औषधीय प्रयोजनका लागि गाजा खेतीजस्ता कार्यक्रमहरूप्रति सरकारले चासो नदेखाएको भन्दै असन्तोष प्रकट गरे ।
उनले अदालतको कार्यशैली र निर्णय प्रक्रियामाथि प्रश्न उठाए । उनले भने, ‘अहिले आमनेपाली जनताले मात्र होइन पूरा दुनियाँले हेरेको छ– हाम्रो अदालतको कार्यशैली कस्तो छ, निर्णय प्रक्रिया कस्तो छ । हाम्रो संवैधानिक निकायहरू कुन वैधानिक र आधिकारिक मान्यतामा बन्ने र भत्किने गरेका छन् । हाम्रा संसदीय समिति र संसद् कुन अथोरिटी कुन मूल्य र मान्यतामा टेकेर अगाडि बढेका छन् दुनियाँले हेरिराखेको छ । हामी सबैको लागि चुनौती बनेको छ ।’
