-नारायण गाउँले ।
ओलीजीले सत्तरी करोड काण्डलाई मजाकजस्तै बनाइदिनुभयो । मन्त्रीले कमिशन मागेको स्पष्ट अडियो थियो । त्यो सेक्युरिटी प्रेस खरीदमा अर्बौंं रूपैयाँ घुस खाइएको पुष्टि पनि भयो । ती मन्त्रीबाहेक अरू जेलमा गए । किनकी उनीमाथि अख्तियारले मुद्दा नै चलाएन । आज तिनै मन्त्री भ्रष्टाचार भए नभएको छानबिन गर्ने समितिमा छन् । अहिले तपाईंकै अर्का मन्त्री राजकुमार गुप्तामाथि घुस खाएको गम्भीर आरोप र अडियो नै सार्वजनिक भएको छ । गत महिनादेखि नै यसका विवरण र प्रमाण मिडियामा आएका छन् । तर तपाईंको रौँ पनि हल्लिएको देखिन्न । मन्त्रीले घुस मागेको ‘अडियो’ नै सार्वजनिक हुँदा पनि तत्काल निलम्बन र अनुसन्धान नहुनु दुर्भाग्यपूर्ण छ ।
सोच्नुस् त त्यो घुस एउटा सरूवाको हो । उनी सङ्घीय मामिला तथा सामान्य प्रशासनमन्त्री हुन् । हजारौँ कर्मचारीको सरूवा हुन्छ । देशमा भ्रष्टाचार कति गहिरो र व्यापक छ । अनि उनले त्यो घुस खाएको सरूवा पनि भूमिसम्बन्धी पदमा मान्छे लैजान रहेछ । एमालेको ध्यान भूमिमाथि अलि बढी नै भएको जस्तो देखिन्छ । बाहिर नआएका अडियो कति होलान् । के सत्तरी करोडले आज एमाले कार्यकर्तालाई अनुशासन र सुशासनको तालिम दिने काम पाएजस्तै यी मन्त्रीले पनि तपाईंले भन्ने गरेको उच्चस्तरीय सुशासन आयोगको अध्यक्ष पाउने त होइनन् ? के जीवनको यो उत्तराद्र्धमा समेत पार्टीलाई भ्रष्टाचारको संरक्षक र अखडा जस्तो बनाउन आफ्नो भूमिका देखिनुमा तपाईंलाई लज्जाबोध हुँदैन ?
