काठमाडौं । संसदको राज्य व्यवस्था तथा सुशासन समितिका सभापति रामहरि खतिवडाले निजामती विधेयक अघि नबढाइएको भन्दै सरकारको ध्यानाकर्षण गराएका छन् ।
बिहीबारको प्रतिनिधिसभा बैठकमा सभापति खतिवडाले निजामती विधेयक रोकिएको भन्दै सरकारको ध्यानाकर्षण गराएका हुन् ।
उनले भने, ‘निजामती विधेयक कार्यसूचीमा आज प्रवेश गरेको देखिनँ । राज्य व्यवस्था तथा सुशासन समितिबाट हामीले पेस गरेको निजामती विधेयक यहाँ आएर किन रोकियो ? छट्टै त्यो कार्यसूचीमा आएर पारित हुने विश्वास मैले लिएको छु।’
सभापति खतिवडाले असार १ गते प्रतिनिधिसभामा पेस गरेका थिए। मंगलबार पारित गर्ने गरी कार्यसूचीमा राखिए पनि कार्यसूचीमा प्रवेश नभई सभा स्थगित भयो । तर बिहीबार पनि यो विषय कार्यसूचीमै राखिएन ।
कुलिङ पिरियड राख्न नहुने पक्षमा मुख्यसचिवसहितका सचिवहरुले प्रधानमन्त्रीदेखि नेताहरुसँग लविङ गरिरहेका छन् । कर्मचारीकै कारण यो रोकिएको भन्दै आजको संसद बैठकमा सत्तापक्ष र विपक्षी दलका सांसदहरुले सरकारलाई खुट्टा नकमाउन आग्रह गर्दै कुलिङ पिरियडको व्यवस्था नहटाउन माग गरेका छन् ।
