काठमाडौं । नेपाली कांग्रेसका नेता डा. शेखर कोइरालाले उखु किसानलाई दिँदै आएको अनुदान रोकिएको आपत्ति जनाएका छन् ।
बिहीबार सामाजिक संजालमार्फत कोइरालाले यसले उखु किसान विस्थापित हुने पक्क भएको बताएका हुन् । कोइरालाले विचौलियाको प्रभावमा परेको निर्णय गरेको त होइन भन्दै प्रश्न गरेका छन् ।
उनले भनेका छन्, ‘उखु किसानलाई दुई दशक अघिदेखि दिईंदै आएको उत्पादनमा आधारित अनुदान विनाकारण रोकिनु आपत्तिजनक छ । चिनी उद्योगलाई आत्मनिर्भर वनाउनुपर्नेमा यस्तो निर्णयले उखु किसान विस्तापित हुने पक्का छ । कतै सरकारको यो निर्णय चिनी विचौलियाको प्रभावमा परेर भएको त हैन ?’
उखु खेतीमा कृषकलाई प्रोत्साहन गर्न ७ वर्षदेखि दिइँदै आएको अनुदान रकम अगामी आर्थिक वर्षको बजेटमा कटौती गरिएको छ । चालु आर्थिक वर्ष २०८१/८२ को बजेटमा उखु खेती प्रवद्र्धनका लागि किसानलाई प्रोत्साहन गर्न २ अर्ब २५ करोड रुपैयाँ विनियोजन गरिएको थियो ।
तर, आगामी आर्थिक वर्षको बजेटमा यसबारे कतै उल्लेख नभएपछि किसान चिन्तित बनेका छन् । सरकारले कार्यविधि नै निर्माण गरेर २०७५ सालदेखि उत्पादनका आधारमा किसानलाई अनुदान रकम दिँदै आएको थियो । सरकारले प्रतिक्विन्टल उखुमा ७० रुपैयाँ अनुदान दिने गर्छ ।
