बैंकक । प्रधानमन्त्री केपी शर्मा ओलीको थाइल्याण्ड भ्रमणको तेस्रो दिन थाई र नेपाली व्यवसायीसँग छलफल गरेका छन्।
सो क्रममा नेपालमा लगानीका सम्भावना र अवसरबारे सहकार्यका विषयमा छलफल भएको छ। नेपालमा लगानीको सम्भावना र अवसरबारे प्रधामन्त्रीले नेपाल र थाइल्याण्डका व्यापारीसँग छलफल गरे।
प्रधानमन्त्रीका आर्थिक सल्लाहकार डा युवराज खतिवडाले दुई देशका व्यापारीहरुको छलफलमा लगानीका विविध आयामका विषयमा छलफल भएको बताए।
उनका अनुसार छलफलका क्रममा लगानीमात्रै नभई भावनात्मक रुपमै सहकार्य गर्न नेपाल तयार रहेको सन्देश प्रधानमन्त्री ओलीले थाई उद्योगी व्यापारीसहित लगानीकर्ताहरुलाई दिए।
निर्माण उद्योग, होटल व्यवसायी, खाद्य प्रशोधन, पर्यटनसँग सम्बन्धित लगानीकर्ताहरु छलफलमा सहभागी थिए। उनीहरुले नेपालमा लगानी गर्न आतुर रहेको बताएका थिए।
‘निर्माण उद्योग, होटल व्यवसायी, खाद्य प्रशोधन, पर्यटनसँग सम्बन्धित लगानीकर्ताहरु छलफलमा सहभागी हुनुहुन्थ्यो । उहाँहरुले नेपालमा लगानी गर्न आतुर रहेको बताउनु भयो। त्यसका लागि उपयुक्त पार्टनहरुको खोजी हामी गर्छौं भनेर थाई लगानीकर्ताले गर्नुभएको छ‚’ छलफलबारे जानकारी दिँदै खतिवडाले भने‚ ‘लगानी गरिसकेपछि विदेशी मुद्रा फर्काउनेबारे नेपालमा रहेको व्यवस्थाका बारेमा चासो रह्यो। कर्मचारी प्रशासनले दिने दुःख, झन्झटिलो व्यवस्थालाई हटाउन, भन्सारका दरहरु घटाएर व्यवस्थित गर्नसमेत लगानीकर्ताले जोड दिनुभयो।’
छलफलमा सहभागी नेपाल उद्योग वाणिज्य महासंघका अध्यक्ष चन्द्रप्रसाद ढकालले नेपालमा लगानी गर्नुपर्ने क्षेत्रहरुबारे छलफल भएको बताए। उनका अनुसार ती क्षेत्रमा लगानीका लागि प्रधानमन्त्री ओलीले आह्वान गरे।
छलफलका क्रममा नेपाल उद्योग वाणिज्य महासंघको तर्फबाट ढकालले आफ्नो भनाइ राख्दै कानूनहरु संशोधनपछि लगानीमा सहज बनाएको र थाई व्यवसायीलाई नेपालमा लगानीका लागि सहज रहेको बताए।
‘नेपालमा इनभेष्ट गर्नुपर्ने जति पनि सेक्टर छन् ती सेक्टरमा लगानी गर्न प्रधानमन्त्रीले आह्वान गर्नुभयो। धेरैजसो लगानीसम्बन्धी कानूनहरु परम्परागत थिए, ती लगानीका लागि बाधक थिए,’ उनले भने‚ ‘ती सबै कानूनहरुलाई संशोधन गरेर सहज बनाइएको अवस्था छ, सरकारको कमिटमेन्ट इन्स्योरेन्स गर्ने भन्ने छ, त्यसले थाई व्यवसायीहरुलाई नेपालमा लगानी गर्न प्रोत्साहन गरेको छ।’
छलफलका क्रममा थाई व्यवसायीहरुले पर्यटन, होटल, हस्पिटल, निर्माणजन्य कच्चा पदार्थ जस्ता नेपालमा सम्भावित लगानीका क्षेत्रमा लगानी गर्न चासो देखाएका थिए।
लगानी गर्नका लागि कानून सहज भए/नभएको, लगानीपछि मुनाफा फिर्ता लैजाने कानूनी प्रवन्ध के कस्तो रहेकोबारे चासो राखेका थिए। नेपालमा विदेशी मुद्राको सहजता, रिजर्भहरु के कस्तो छ भन्ने उनीहरुको चासो रहेको थियो।
थाई व्यवसायी तथा लगानीकर्ताहरुलाई नेपाली व्यवसायीको प्रतिनिधिमूलक टोलीले नेपालमा लगानीका लागि धेरै सम्भावना रहेको बताएको थियो।
जलविद्युत क्षेत्रमा भारतसँग १० हजार मेगावाटको सम्झौता भएको थियो। सोहीअनुसार उत्पादन गर्नुपर्ने अवस्था, पर्यटन क्षेत्रमा प्रवर्द्धन गर्न पनि नेपालमा प्रचुर सम्भावना रहेको कुरा छलफलमा राखिएको ढकालले जानकारी दिए।
