काठमाडौँ । प्रधानसेनापति अशोकराज सिग्देलले नेपाली सेनाद्वारा आयोजित लघुचलचित्र प्रतियोगिताका विजयीलाई पुरस्कार तथा प्रमाणपत्र प्रदान गरेका छन् ।
सैनिक मुख्यालय जङ्गीअड्डामा बुधबार आयोजित कार्यक्रममा प्रधानसेनापति सिग्देलले प्रतियोगितामा पहिलो भएका रवीन तामाङ (चलचित्र ‘उडान’), दोस्रो भएका कमल यक्षमगर (चलचित्र ‘अवशेष’) तथा तेस्रो भएका धीरज थापामगर (चलचित्र ‘सेलुट’)लाई नगद पुरस्कार र प्रमाणपत्र प्रदान गरेका हुन् ।
प्रथम, द्वितीय र तृतीय घोषितलाई क्रमशः दुई लाख, एक लाख ५० हजार र एक लाख नगद पुरस्कार तथा प्रमाणपत्र प्रदान गरिएको थियो ।
कार्यक्रममा प्रधानसेनापति सिग्देलले नेपाली सेनाका पूर्वउपरथी एवं साहित्यकार डा आशबहादुर तामाङले सेनाका विभिन्न पदमा रहँदा लेखेका कविता, गीत, गजल र लेख समेटिएको ‘सिपाहीको कलमबाट–भाग २’ कृति समेत विमोचन गरे । सो पुस्तकमा विश्वशान्ति कार्यमा नेपाली सेनाका भूमिका विषयमा लेखिएका सात लेख, लप्टनदेखि उपरथी हुँदासम्म लेखेका १७ कविता, ४७ गीत र गजल, समेटिएका छन् ।
पुस्तकमा समेटिएका सिर्जनामा सिपाहीले बन्दुकमात्र समाउने होइन, कलममार्फत पनि समाजमा उत्प्रेरणा दिने सकारात्मक सन्देश दिलाउने काम गरेको छ भन्ने सन्देश दिइएको छ । यसको भाग एक गतवर्ष प्रकाशित भएको थियो । त्यस अवसरमा नेपाली सेनाको वार्षिक पत्रिका ‘सिपाही’ का उत्कृष्ट लेखका स्रष्टालाई समेत नगद पुरस्कार र प्रमाणपत्र प्रदान गरिएको थियो ।
उक्त पत्रिकामा प्रकाशित सुजता बस्नेत, सुरज लामिछाने र चन्द्रदेव भट्टको लेखलाई क्रमशः पहिलो, दोस्रो र तेस्रो घोषित गरिएको छ ।
कार्यक्रममा सैनिक जनसम्पर्क तथा सूचना निर्देशनालयका निर्देशक गौरवकुमार केसीले २०५८ चैत २० गते स्थापना भएको निर्देशनालयले नेपाली सेनासम्बन्धी सत्यतथ्य गतिविधि र सूचना आमजनता समक्ष पुर्याउने कार्यलाई उच्च प्राथमिकता दिएको बताए ।
