काठमाडौं । नेकपा माओवादी केन्द्रका सांसद लेखनाथ दाहालले गत असोज दोस्रो साता आएको बाढीपहिरो पीडितका लागि राहत, पुनःस्थापना तथा पुनःनिर्माणका काममा ढिलाइ भइरहेको भन्दै सरकारको ध्यानाकर्षण गराएका छन् ।
शुक्रबारको प्रतिनिधिसभा बैठकमा सांसद दाहालले बिपी राजमार्ग अहिलेसम्म पनि पुनःनिर्माण सुरु हुन नसकेको भन्दै तत्काल बजेटको व्यवस्था गरी काम थाल्न आग्रह गरेका हुन् ।
उनले बाढी गएको लामो समयसम्म पनि पुनर्निर्माण र राहतका लागि सङ्घीय सरकारको उपस्थिति नभएको भन्दै आवश्यक बजेटको व्यवस्था गरेर राजमार्ग पुनर्निर्माण गर्न माग गरे ।
उनले भने, ‘असोजमा गएको बाढीबाट क्षतिग्रस्त भएको वीपी राजमार्ग पुनर्निर्माण र पीडितलाई राहत दिने काममा सङ्घीय सरकारको उपस्थिति देखिएन । वीपी राजमार्गको पुनर्निर्माण नै सुरु भएन । त्यतिमात्र होइन, त्यहाँ चलेका अवैध क्रसरका कारण रोशीमा पानी भन्दा बढी लेदो बग्छ ।’ उनले सभामुखमार्फत अवैध क्रसरमा रोक लगाइदिन रुलिङको माग गरे ।
उनले भने, ‘वीपी राजमार्गको पुनर्निर्माणमा १० अर्ब बजेट लाग्ने अनुमान छ तर ५० करोड रकम विनियोजन गरेर अस्थायी रूपमा पुनर्निर्माण गर्न सकिन्छ । त्यसो गरियो भने दशौँ हजार गाडी आवतजावत गर्न सक्छन् ।’
