काठमाडौँ । नेपाली कांग्रेस लोकतान्त्रिक खेलकुद सङ्घ महाधिवेशन निर्देशन समितिको आयोजनामा भएको सभापति कप फुटबल प्रतियोगितामा न्यू रोड टिम (एनआरटी) सेमिफाइनलमा प्रवेश गरेको छ ।
त्रिपुरेश्वोरस्थित दशरथ रङ्गशालामा आइतबार भएको चौथो क्वाटरफाइनलमा एनआरटीले फ्रेन्ड्स क्लबलाई ३–१ गोलले पराजित गर्दै सेमिफाइनलमा प्रवेश गरेको हो । एनआरटीका लागि कप्तान अन्जन विष्टले दुई तथा रिचार्ड विल्सनले एक गोल गरे । फ्रेन्ड्सका लागि विवेक पौडेलले सान्त्वना गोल गरे ।
खेलको २३औँ मिनेटमा एन्जल महर्जनको ‘पास’मा अन्जनले गोल गर्दै टोलीलाई पहिलो अग्रता दिलाए । त्यसको पाँच मिनेटपछि अन्जनले व्यक्तिगत दोस्रो गोल गरे । कृतिश रत्न छुन्जुको ‘क्रस’लाई अन्जनले ‘हेडर’मार्फत गोलमा परिणत गरे ।
खेलको दोस्रो हाफको सुरुआतमै रिचार्ड विल्सनले एनआरटीलाई ३–० गोलको अवस्थामा पुर्याए । खेलको ८१औँ मिनेटमा फ्रेन्ड्सका कप्तान विवेक पौडेलले गोल गरे । प्रतियोगिताअन्तर्गत सोमबार पहिलो सेमिफाइनल खेल सङ्कटा क्लब र मच्छिन्द्र फुटबल क्लबबीच साँझ ५ः३० बजे हुनेछ ।
