बीबीसी । राष्ट्रपति यून सुक यउलविरुद्ध दोस्रो पटक दर्ता भएको महाभियोगमा मतदान सुरु हुनुअघि दक्षिण कोरियाको संसद् बाहिर सयौँ प्रदर्शनकारीहरू भेला भएका छन् ।
आफ्नो सत्ता टिकाउन प्रयास गरिरहेका राष्ट्रपति यूनको समर्थनमा पनि राजधानी सोलको एउटा क्षेत्रमा प्रदर्शन भएको छ । ११ दिनअघि दक्षिण कोरियामा सैनिक शासन लगाउने निर्णयपछि राष्ट्रपति यूनलाई पदबाट हटाउनुपर्ने माग बढेको छ।
विपक्षी दलबाट महाभियोगको प्रक्रियासँगै उनको राजीनामा माग गर्दै प्रदर्शनहरू पनि भइरहेका छन्। उनले घोषणा गरेको ‘मार्शल ल’ अर्थात् सैनिक शासन संसद्ले मतदानबाट अस्वीकृत गरेपछि छ घण्टामै फिर्ता भएको थियो ।
यसअघि यूनविरूद्ध दर्ता भएको महाभियोगको पक्षमा न्याश्नल असेम्ब्लीमा भएको मतदानमा दुई तिहाइ बहुमत पुगेको थिएन । महाभियोग प्रस्तावमा दोस्रो पटक मतदान सुरु हुनुअघि सत्ताधारी पीपल्स पावर पार्टीका एक जना सांसद आफ्नो दलका अन्य सांसदहरूलाई पनि महाभियोगको पक्षमा मतदान गर्न आग्रह गरिरहेका छन्।
एक जना सांसद यस्तो आग्रह गरिएको साइन बोर्ड बोकेर संसद् भवन अगाडी बसेका थिए । गतसाता भएको मतदान सत्ताधारी दलका सांसदहरूले बहिस्कार गरेका थिए।
विपक्षी डेमोक्र्याटिक पार्टीले अघि सारेको महाभियोग प्रस्ताव पारित हुन २०० मत आवश्यक थियो। तर विपक्षी दलका सबै १९२ र सत्तारूढ दलका तीन जना सांसदले मात्रै त्यसको पक्षमा मतदान गरेको विवरण आएका थिए ।
विपक्षी सांसदहरूले यून पदबाट नहटेसम्म हरेक शनिवार महाभियोगमा मतदान हुने गरि प्रक्रिया अघि बढाइने बताएका छन् । दक्षिण कोरियामा राष्ट्रपतिविरुद्ध महाभियोग लगाउन संसद् ’न्याश्नल असेम्ब्ली’ को दुईतिहाइ मत आवश्यक पर्छ। अहिलेको समीकरणका हेर्दा सत्ताधारी दलका कम्तीमा आठ सांसदले विपक्षीलाई साथ दिनुपर्छ।
