काठमाडौं । सिद्धार्थ बैंक नेपाल प्रिमियर लिग(एनपीएल)मा आज दुई खेल हुँदैछ । आज हुने पहिलो खेलमा पोखरा एभेन्जर्स र काठमाडौं गुर्खाज भिड्दैछन् । कीर्तिपुरस्थित टियु क्रिकेट मैदानमा हुने खेल बिहान ९:१५ बजे शुरु हुनेछ ।
दुवै टोलीको लागि आजको खेल निकै महत्त्वपूर्ण रहेको छ । प्लेअफमा पुग्ने सम्भावना जीवित राख्न दुवै टोलीलाई आज जित निकाल्न अति आवश्यक रहेको छ । हाल काठमाडौं र पोखरा ५ खेलबाट ४ अंक जोड्दै तालिकाको क्रमशः छैटौं र सातौँ स्थानमा रहेका छन् ।
यस्तै आजै हुने दोस्रो खेलमा चितवन राइनोज र जनकपुर बोल्ट्स खेल्दै छन् । खेल दिउँसो १:१५ बजे शुरु हुनेछ । जनकपुर यसअघिनै प्लेअफमा पुगिसकेको छ भने चितवन आजको खेल जित्दै प्लेअफको सम्भावना जीवित राख्न चाहन्छ । हाल जनकपुर ६ खेलबाट १० अंक जोड्दै तालिकाको शीर्ष स्थानमा रहेको छ भने समान खेलबाट ६ अंक जोडेको चितवन चौथो स्थानमा छ ।
