काठमाडौं । पूर्वप्रधानमन्त्री झलनाथ खनालले चीन अघि सारेको वेल्ट एण्ड रोड इनिसिएटिभ(बीआरआई) बारे अनावश्यक विवाद नगरी नेपालको राष्ट्रिय हितलाई सर्वोपरि राखेर अघि बढ्नुपर्ने बताएका छन् ।
बिहीबार विज्ञप्ति जारी गरी खनालले चीनले अघि सारेको भए पनि अब बीआरआई विश्वव्यापी अवधारणा र परियोजना बताएका हुन् । उनले नेपालका एकपछि अर्का सरकारहरु पश्चिमा शक्तिहरुको चीन विरोधी कुप्रचारको शिकार भएर बीआरआई सहयोगलाई ‘ऋण पासो’ का रुपमा व्याख्या गर्दै नेपाल र नेपालीको भाग्य माथि खेलवाड गरिरहेका उल्लेख गरेका छन् ।
विज्ञप्तिमा भनिएको छ, ‘फेरि पनि बीआरआई गर्ने कि नगर्ने भन्ने विषयमा नै सत्तारुढ दुई दल बीच वहस भैरहनु र ठोस निर्णय गर्न नसक्नु मुलुककै निम्ति विडम्वना बन्न पुगेको छ । त्यही बीआरआई विश्वका १५३ देशहरुका लागि हितकर हुने तर नेपालको निम्ति ‘ऋण पासो’ कसरी हुन्छ ? यो कहाँको स्टान्डर हो ? सत्तारुढ दलहरु नेपाली बुद्धिले चल्छन् कि पश्चिमाहरुको निर्देशनमा चल्छन ? नेपाली जनता आश्चर्य चकित भइरहेका छन् ।’
