सुनसरी । १२ वर्षअघि सुनसरीको झुम्का कारागारबाट सुरूङ्ग खनी फरार भएका एक अभियुक्तलाई प्रहरीले पक्राउ गरेको छ ।
२०६९ कात्तिक २३ गते झुम्का कारागारबाट सुरूङ्ग खनी फरार भएका विनायककुमार यादवलाई छठ मनाउने क्रममा प्रहरीले गएराति कोशी गाउँपालिकाको पथरचट्टानबाट फक्राउ गरी शुक्रबार सार्वजनिक गरेको हो ।
छठ मनाउन भारतको विहार हुँदै नेपाल आउँदै गरेको सूचनाको आधारमा उनलाई पक्राउ गरेको जिल्ला प्रहरी कार्यालय सुनसरीले जनाएको छ ।
उनलाई पक्राउ गर्ने क्रममा प्रहरीले एक राउण्ड गोली समेत चलाएको थियो । प्रहरी उपरीक्षक सुमनकुमार तिम्सिनाले पक्राउको क्रममा प्रतिवादी भाग्न खोजेकाले उनलाई नियन्त्रणमा लिन घुँडामुनी गोली फायर गर्नुपरेको बताए ।
यादव कर्तव्य ज्यान तथा हातहतियार खरखजाना मुद्दामा जिल्ला अदालत सुनसरीबाट दोषी ठहर भएका थिए। अदालतको फैसला बमोजिम २० वर्ष ८ महिना १४ दिनको सजाय कैद भुक्तानका क्रममा झुम्का कारागारमा रहँदा उनी सुरूङ खनेर भागेका थिए । त्यतिबेला भागेका १२ मध्ये प्रहरीले हालसम्म सात जनालाई पक्राउ गरेको छ ।
