बीबीसी । अमेरिकी उपराष्ट्रपति कमला ह्यारिसले बाइडन प्रशासन र डोनल्ड ट्रम्पबीच शान्तिपूर्ण ढङ्गले सत्ता हस्तान्तरण गर्न आफूले सघाउने बताएकी छन् ।
वाशिङ्टन डीसीमा समर्थकहरूलाई सम्बोधन गर्दै उनले चुनावको परिणामलाई स्वीकार गरे पनि ’चुनावी अभियानलाई बल दिएको लडाइँप्रति हार नमान्ने’ बताइन् ।
उनले आफूले सबै मानिसहरूको स्वतन्त्रता, अवसर, सम्मान र समानताको लागि लडिरहने पनि धारणा राखेकी थिइन् । यसअघि बुधबार ह्यारिस र राष्ट्रपति बाइडेनले राष्ट्रपति–निर्वाचित डोनल्ड ट्रम्पलाई टेलिफोन गरेर निर्णायक जितका लागि बधाई दिएका थिए ।
ट्रम्पको अभियानले संयुक्त राज्य अमेरिकालाई एकताबद्ध बनाउनुको महत्त्वबारे ह्यारिससँग पूर्व राष्ट्रपति सहमत रहेको जनाएको छ । चुनावमा पराजित भएपछि उपराष्ट्रपति ह्यारिसले वाशिङ्टनस्थित आफू अध्ययन गरेको हाउअर्ड विश्वविद्यालयमा एउटा भावपूर्ण सम्बोधन गरेकी थिइन् ।
उनले समर्थकहरूलाई अमेरिकाको ’उज्ज्वल भविष्यका लागि लड्न नछाड्न’ अनुरोध गरेकी थिइन्। उनको अभियानकातर्फबाट समर्थकहरूलाई पठाइएको इमेलमा पनि त्यसमा जोड दिइएको छ । चुनावको परिणाम आफूहरूले चाहेको जस्तो नआएको उल्लेख गरेकी उनले भनिन्, ‘जबसम्म हामीले हार मान्दैनौँ र लडाइ जारी राख्नेछौँ, अमेरिकाप्रतिको आशाको ज्योति सधैँ उज्यालो बल्नेछ। म यो चुनावमा हार स्वीकार गर्छु तर यो अभियानलाई बल दिएको लडाईँमा हार मान्दिनँ।’
पूर्वराष्ट्रपति बराक ओबामा र पूर्व प्रथम महिला मिशेल ओबामाले राष्ट्रपति–निर्वाचित डोनल्ड ट्रम्प र उनका उपराष्ट्रपति जेडी भान्सलाई शुभकामना दिएका छन् ।
ओबामा दम्पतीले आफूहरूले कमला ह्यारिस र उनका उपराष्ट्रपति उम्मेदवार टिम वाल्जप्रति निक्कै गर्व महसुस गरेको पनि उल्लेख गरेका छन्। ती दुईले उल्लेखनीय अभियान चलाएको उनीहरुको भनाई छ ।
ओबामाले महामारी र त्यसपछिको मूल्यवृद्धिले संसारभर यथास्थितिका विरुद्धमा चुनौती खडा गरेको भन्दै अमेरिका पनि त्यसबाट अछुतो नदेखिएको उल्लेख गरे । ती समस्याहरू समाधान गर्न सकिने उल्लेख गर्दै ओबामाले त्यसका लागि एक अर्काको कुरा सुन्नुपर्ने र आधारभूत संवैधानिक सिद्धान्त र लोकतान्त्रिक मान्यताहरू पालना गर्नुपर्ने टिप्पणी गरेका छन्।
