मेड्रिड । स्पेनको एक अदालतले प्रधानमन्त्री पेड्रो सान्चेजले आफ्नी पत्नी बेगोना गोमेजद्वारा कथित प्रभाव पार्ने र भ्रष्टाचारको अनुसन्धान गरिरहेका न्यायाधीशविरुद्ध दायर गरेको मुद्दा खारेज गरेको छ ।
न्यायाधीश जुआन कार्लोस पेइनाडोले प्रधानमन्त्रीलाई आफ्नी पत्नीको मुद्दामा लिखित रूपमा बयान दिन अनुमति दिन अस्वीकार गरेपछि स्पेनको राज्य कानूनी सेवामार्फत मुद्दा दायर गरेर सान्चेजले जुलाईमा पेइनाडोमाथि कानून उल्लङ्घन गरेको आरोप लगाएका थिए ।
प्रधानमन्त्री सान्चेजलाई त्यसको सट्टा गोमेजको व्यावसायिक सम्बन्धको अनुसन्धानमा आफ्नो आधिकारिक मेड्रिड निवासमा बयान दिन बोलाइएको थियो । यसबाट महिनौँदेखि स्पेनी राजनीतिलाई तरङ्गित भएको छ ।
तर मेड्रिड उच्च अदालतले शुक्रबार प्रकाशित फैसलामा मुद्दालाई ‘आधारहीन’, ‘नियतवश अनावश्यक’ र ‘स्वेच्छाचारी’ भन्दै खारेज गरेको छ ।
“यसले एकै समयमा न्यायपालिकाको कर्तव्यसँग सम्बन्धित हुनुपर्ने शान्त वातावरणलाई गम्भीर रूपमा कमजोर बनाउँछ”, अदालतले भनेको छ ।
राज्यको शक्ति प्रयोग गर्ने अधिकारीहरूको न्यायाधीशहरूको स्वतन्त्रता संरक्षण गर्न त्यो वातावरण कायम राख्ने विशेष जिम्मेवारी रहेको फैसलामा उल्लेख छ ।
कन्जरभेटिभ विपक्षी पोपुलर पार्टीले सान्चेजलाई निजी हितका लागि सार्वजनिक संस्थाहरूको प्रयोग गरेको भन्दै आलोचना गरेको छ । पार्टीका नेता अल्बर्टो नुनेज फेइजोले सामाजिक सञ्जाल एक्समा लेखेका छन्, “राज्य कानूनी सेवालाई पुगेको क्षति ‘अब ऐतिहासिक स्तरमा पुगिरहेको छ’ ।”
वर्षौँदेखि कोष सङ्कलनमा काम गरेकी गोमेज अप्रिलदेखि कथित प्रभाव पार्ने र भ्रष्टाचारको आरोपमा अनुसन्धानमा छिन् । यो जाँच अति दक्षिणपन्थीसँग सम्बन्धित भ्रष्टाचार विरोधी गैरसरकारी संस्था ‘मानोस लिम्पियास’ (स्वच्छ हातहरू) द्वारा दायर गरिएको उजुरीबाट उत्पन्न भएको थियो ।
उनीमाथि आफ्नो पेशागत क्षेत्रमा, विशेष गरी सार्वजनिक कोष खोजिरहेका एक व्यवसायी जुआन कार्लोस बराबेससँग आफ्नो पतिको पदलाई लाभको रूपमा प्रयोग गरेको आरोप लगाइएको छ ।
आरोपहरू आफ्नो कमजोर अल्पमत सरकार विरुद्ध कन्जरभेटिभ र अति दक्षिणपन्थी विपक्षद्वारा गरिएको बदनाम अभियानको हिस्सा हुन् भन्दै प्रधानमन्त्री सान्चेज र उहाँको सोसलिस्ट पार्टीले बारम्बार आरोपहरूलाई बारम्बार खारेज गरेका छन् ।
पाँच दिनसम्म आफ्नो कर्तव्यबाट अलग रहेर जारी राख्ने निर्णय गर्नुअघि सान्चेजले सुरुमा अप्रिलमा यो मामिला सार्वजनिक हुँदा प्रधानमन्त्री पदबाट राजीनामा दिने धम्की दिएका थिए ।
