काठमाडौं । एभरेस्ट महिला भलिबल लिगमा कर्णाली एश्विजले लगातार दोस्रो जित निकालेको छ । मंगलबार दिउँसो भएको खेलमा कर्णालीले गण्डकी थन्डर्सलाई ३-२ को सेटमा हराएको हो ।
त्रिपुरेश्वरस्थित राष्ट्रिय खेलकुद परिषद्को कभर्ड हलमा भएको खेलमा गण्डकीले पहिलो सेट २५-१५ ले जित्दै खेलको शुरुवात गरेको थियो । दोस्रो सेट कर्णालीले २५-२२ ले जित्दै खेलमा फर्किएको थियो । तेस्रो सेटपनि २५-१७ ले आफ्नो पक्षमा पर्दै कर्णालीले अग्रता लिएको थियो ।
चौथो सेट गण्डकीले २५-१९ ले जित्दै खेल २-२ को बराबरीमा ल्याएको थियो । यस्तै पाँचौ तथा निर्णायक सेटमा कर्णालीले १५-११ ले जित्दै खेल आफ्नो पक्षमा पारेको हो ।
यसअघि कर्णालीले सोमबार भएको पहिलो खेलमा मधेश युनाइटेडमाथि ३-१ को जित निकालेको थियो । यता गण्डकीको भने लगातार दोस्रो हार हो । पहिलो खेलमा गण्डकी चितवन शक्तिसँग ३-१ ले पराजित भएको थियो ।
