काठमाडौं । क्यानडामा जारी त्रिकोणात्मक टी-२० आई सिरिजमा आज नेपाल र घरेलु टोली क्यानडा भिड्दैछन् । किंङ सिटिमा हुने खेल नेपाली समय अनुसार राति ९:४५ बजे शुरु हुनेछ ।
आज हुने खेलमा नेपाल बदला लिने लक्ष्य साथ मैदान उत्रिनेछ । सिरिजको पहिलो खेलमा क्यानडासँग १४ रनले पराजित भएको नेपाल आज उक्त हारको बदला लिँदै लगातार दोस्रो जित निकाल्न चाहन्छ । नेपालले दोस्रो खेलमा ओमानलाई ३७ रनले पराजित गरेको थियो ।
यता क्यानडापनि आज नेपाललाई हराउँदै दोस्रो जित निकाल्ने दाउमा रहेको छ । पहिलो खेलमा नेपाललाई हराएको क्यानडा दोस्रो खेलमा ओमानसँग ८ विकेटले पराजित भएको थियो ।
हाल नेपाल, ओमान र क्यानडा सबै टोलीले समान दुई/दुई अंक जोडेका छन् । नेट रनरेटको आधारमा नेपाल शीर्ष, ओमान दोस्रो र क्यानडा तेस्रो स्थानमा रहेका छन् ।
