काठमाडौं । नेपाल र इण्डोनेसियाबीच पर्यटन प्रवर्द्धनमा सहकार्यका लागि छलफल भएको छ । इण्डोनेसियाको टुरिजम तथा क्रियटिभ इकोनोमी मन्त्रालयका पर्यटन उपमन्त्री नी माडे आयु मार्थिनी र नेपाल पर्यटन बोर्डका कार्यकारी प्रमुख दीपकराज जोशीबीच आज दुई देशको पर्यटन प्रवर्द्धन तथा आपसी सहकार्यका विषयमा छलफल भएको हो ।
नेपाल पर्यटन बोर्डमा भएको भेटघाटमा उनीहरूबीच दुवै देशको पर्यटन प्रवर्द्धनमा आपसी सहकार्यका साथ अगाडि बढ्ने विषयमा छलफल भएको थियो ।
त्यस अवसरमा उपमन्त्री मार्थिनीले नेपालको कला, संस्कृति र सुन्दरताले आफू मोहित भएको बताउँदै नेपालको पर्यटन प्रवर्द्धनका लागि आफ्नो तर्फबाट सहयोग गर्ने प्रतिबद्धता व्यक्त गरे ।
“नेपाल साँच्चिकै सुन्दर रहेछ । यहाँको आतिथ्यता र यहाँका मानिसको व्यवहारले म मोहित भएकी छु । नेपालमा पर्यटनको पर्याप्त सम्भावना छ, यसको प्रवर्द्धनका लागि म आफ्नो तर्फबाट सक्दो प्रयास गर्ने प्रतिबद्धता व्यक्त गर्दछु”, उनले भने ।
बोर्डका कार्यकारी प्रमुख जोशीले नेपाल इण्डोनेसियाबीच सौहार्दपूर्ण सम्बन्ध रहेको उल्लेख गर्दै बोर्ड आससी सहकार्यका लागि सधैँ तयार रहेको बताए । उनले ,“नेपाल र इण्डोनेसियाबीच पर्यटन प्रवर्द्धनका लागि विगतमा पनि सहकार्य थियो, हामी त्यो सहकार्यको निरन्तता चाहन्छौँ । जसबाट नेपालको पर्यटन प्रवर्द्धन हुन सकोस् ।”
कार्यकारी प्रमुख जोशीले दुवै देशको पर्यटन प्रवर्द्धनका लागि ‘बीटुबी’ गर्न सकिने तथा सिधा र नियमित उडान गर्न सके दुवै देशले यसबाट फाइदा लिन सक्ने बताए ।
त्यस अवसरमा नेपाल र बङ्गलादेशका लागि इण्डोनेसियाका राजदूत हेरु हर्तान्नो सुबोलोले इण्डोनेसियाको पर्यटन बोर्ड तथा नेपाल पर्यटन बोर्डबीच सहकार्य गर्नु पर्नेमा जोड दिए । उनले दुवै देशलाई फाइदा पुग्ने गरी प्रवर्द्धनात्मक कार्यक्रम गर्न सकिने धारणा राखे ।
