इजरायली सेनाले लडाकु विमानहरू प्रयोग गरी हमास लडाकु सङ्गठनका एक वरिष्ठ नेता इस्माइल हनियाको घरमा आक्रमण गरिएको दाबी गरेको छ । हानिया सन् २०१७ सम्म हमासको राजनीतिक विभागका प्रमुख थिए । उनी कैयौँ वर्षदेखि कतारमा बस्दै आएका छन् । हानिया सन् १९८० को दशकको अन्त्यमा हमासका प्रमुख सदस्य थिए।
उनलाई तीन वर्ष इजरेलको जेलमा पनि राखिएको थियो । गाजा फर्किनुअघि उनले निर्वासनमा एक वर्ष बिताएका थिए । सन् १९९७ मा उनलाई हमासको आध्यात्मिक नेताको कार्यालयको प्रमुख घोषणा गरिएको थियो। त्यसबाट उनको अवस्था बलियो बनेको थियो ।
सन् २००६ मा प्यालेस्टिनी राष्ट्रपति महम्मुद अब्बासले हानियालाई प्रधानमन्त्री नियुक्त गरेका थिए। तर त्यसको एक वर्षपछि साताव्यापी हिंसात्मक द्वन्द्वमाझ अब्बासको फताह पार्टी गाजा क्षेत्रबाट विस्थापित भएको थियो अनि हानिया पदमुक्त भएका थिए ।
हनियाले आफूलाई हटाउने कदम “असंवैधानिक“ रहेको बताउँदै आफ्नो सरकारले ‘प्यालेस्टिनी नागरिकप्रतिको राष्ट्रिय दायित्वलाई नछाड्ने’ बताएका थिए। उनले गाजामा आफ्नो शासन निरन्तर रहेको दाबी पनि गर्दै आएका थिए । यसअघि इजरेलको सेनाले हमासका वरिष्ठ नेताको गाजास्थित घरमा आक्रमण गरेको जनाएको थियो।
