काठमाडौं । त्रिकोणात्मक टी-२० आई सिरिज अन्तर्गत आज हुने फाइनल खेलमा युएईले टस जितेको छ । कीर्तिपुरस्थित टियु क्रिकेट मैदानमा केहिबेरमा शुरु हुने फाइनल खेलमा युएईका कप्तान मोहम्मद वासिमले टस जितेर नेपाललाई पहिले ब्याटिङको निम्तो दिएको हो ।
नेपालले आजको खेलमा एक परिवर्तन गरेको छ । युएईविरुद्धको पछिल्लो खेलबाट विवेक यादवको स्थानमा ललित राजवंशी टोलीमा फर्किएका छन् ।
आज हुने खेलमा दुवै टोली जीत निकाल्दै उपाधि उचाल्न चाहन्छन् । नेपाल सिरिजमा अपराजीत एक्लो टोली हो । नेपालले सिरिजको ४ खेलमै युएई र हङकङलाई हराएको थियो । यता युएईले ४ खेल मध्ये एक खेलमा हङकङलाई पराजीत गर्दा बाँकी तीन खेलमा पराजीत भएको थियो । त्यसैले युएई आज नेपालमाथि बदला लिँदै उपाधि जित्ने मनसायसहित मैदान उत्रिनेछ ।
यसअघिका सबै खेल मुलपानी क्रिकेट मैदानमा भएको थियो । फाइनल खेल भने आज टियु क्रिकेट मैदानमा हुँदैछ । घरेलु मैदानमा उच्च लयमा रहेको नेपाल आजपनि सोहि लयलाई निरन्तरता दिन चाहन्छ ।
दुई टोलीबीच भएको पछिल्लो ५ खेलमा नेपालले तीन खेल जित्दा युएईले दुई खेल जितेको छ । यस्तै पछिल्लो ५ खेलमा नेपालले ४ जीत र एक हारको नतिजा निकाल्दा युएईले एक जीत र ४ हारको नतिजा निकालेको छ ।
नेपालले घरेलु मैदानमा आयोजना हुने आइसीसी टी-२० विश्वकपको एसियाली छनोटको तयारीको स्वरूप सिरिज आयोजना गरेको हो ।
नेपाली टोली- कुशल भुर्तेल, आसिफ शेख, कुशल मल्ल, रोहित पौडल(कप्तान) , दीपेन्द्र सिंह एरी, सन्दीप जोरा, गुलसन झा, करण केसी, सोमपाल कामी, अविनाश बोहोरा, ललित राजवंशी
