काठमाडौं । संसदको अवरोध अन्त्यका लागि प्रधानमन्त्री पुष्पकमल दाहाल प्रचण्डले बोलाएको सर्वदलीय बैठक बिना निष्कर्ष टुंगिएको छ । आइतबार प्रधानमन्त्री कार्यालयमा बसेको सर्वदलीय बैठक सत्ता पक्ष र प्रमुख प्रतिपक्षी दल आफ्ना अडानबाट पछि नहटेपछि बैठक निष्कर्षविहीन भएको हो ।
बैठकमा एमालेले सुन तस्करीको छानबिनका लागि उच्चस्तरीय आयोग गठन गर्नैपर्ने अडान यथावत राखेको छ । बैठकमा आफूहरुको माग यथावत राखेको र सरकारले सुशासन कायम राख्न नसकेकाले आफूहरु मागबाट पछि नहट्ने एमाले प्रमुख सचेतक पदम गिरीले बताए ।
बैठकमा उपप्रधान तथा गृहमन्त्री नारायणकाजी श्रेष्ठले आयोग वा समिति बन्दा नेपाल प्रहरीको केन्द्रीय अनुसन्धान ब्यूरो (सीआईबी)ले गरिरहेको अनुसन्धान प्रभावित हुनसक्ने चिन्ता व्यक्त गरेका छन् ।
राष्ट्रिय स्वतन्त्र पार्टीका अध्यक्ष रवि लामिछानेले सम्भवत: भोलिको बैठकपछि सदन खुल्ने बताए । उनले भने, ‘हामी यो बैठकमा पहिलो पटक बसेका हौं। अस्वस्थ भएकाले प्रमुख प्रतिपक्षी दल नेता केपी शर्मा ओली आउनु भएन । हामी सहमतिको नजिकै पुगेका छौं। अब भोलि बैठक होला र सहमति होला।’
माओवादी केन्द्रका प्रमुख सचेतक हितराज पाण्डेले प्रमुख प्रतिपक्षी दलका नेता केपी शर्मा ओली बैठकमा उपस्थित हुन नसकेको भन्दै पर्सी ३ बजेसम्म सदन रोक्ने र छलफल गर्ने सहमति भएको जानकारी दिए । सुन तस्करी अनुसन्धानका लागि उच्चस्तरीय समितिको माग गर्दै एमालेले साउन १० गतेदेखि सदन अवरुद्ध गर्दै आएको छ ।
