एजेन्सी । गोलकिपर डेभिड डी जियाले इंग्लिस क्लब म्यानचेस्टर युनाइटेड छाड्ने भएका छन् । १२ सिजन युनाइटेडमा बिताएपछि स्पेनिस गोलकिपर डी जियाले क्लब छाड्ने बताएका हुन् ।
सामाजिक सञ्जालमार्फत डी जियाले क्लब छाड्ने बताएका हुन् । सन् २०११ मा एथ्लेटिको म्याड्रिडबाट युनाइटेडमा अनुबन्धित भएका डी जियाले ५ सय ४५ खेल खेलेका थिए । उनले गत सिजन प्रिमियर लिगमा सर्वाधिक क्लिन सिट राख्ने युनाइटेडका पिटर स्माइकलको कीर्तिमानलाई भंग गरेका थिए । उनले गत सिजन प्रिमियर लिगमा गोल्डेन ग्लभ्स पनि जितेका थिए ।
उनले युनाइटेडबाट एक प्रिमियर लिग, एक एफए कप, दुई लिग कप, एक युरोपा लिग र तीन कमिनिटी सिल्ड जितेका थिए । उनले फ्रि एजेन्टको रुपमा युनाइटेड छाडेका हुन् । उनको गत जुन ३० मा युनाइटेडसँगको सम्झौता सकिएको थियो । केहि महिनादेखि सम्झौता नवीकरणको लागि दुई पक्षबीच कुरा भएपनि निष्कर्षमा पुग्न नसकेपछि डी जियाले युनाइटेड छाडेका हुन् ।
हालसम्म डी जिया कुन क्लबमा अनुबन्ध हुने निश्चित छैन । यता युनाइटेड भने आफ्नो नम्बर एक गोलकिपरको रुपमा इन्टर मिलानबाट इन्द्रे ओनामालाई भित्र्याउन अन्तिम चरणमा छ ।
