काठमाडौं । सरकारले ‘अखण्ड भारत’ सम्बन्धी नक्साको वास्तविकता बुझेर प्रतिवेदन बुझाउन दिल्लीस्थित नेपाली दुतावासलाई निर्देशन दिएको छ ।
मंगलबार संसदको अन्तर्राष्ट्रिय सम्बन्ध समितिमा परराष्ट्रमन्त्री एनपी साउदले भारतको नयाँ संसद भवनमा राखेको ‘अखण्ड भारत’सम्बन्धी नक्साको वास्तविकता बुझेर प्रतिवेदन बुझाउन दिल्लीस्थित नेपाली दूताावासलाई निर्देशन दिएको जानकारी दिएका हुन् ।
भारतीय पक्षसँग छलफल गरी वास्तविकता पत्ता लगाएर दूतावासलाई प्रतिवेदन पठाउन निर्देशन दिएको मन्त्री साउदले बताए । भारतको नयाँ संसद भवनभित्र राखेको ’अखण्ड भारत’ सम्बन्धी नक्सामा लुम्बिनी, कपिलवस्तुलगायतका नेपाली भूभाग पनि समेटिएको विषयमा भारत सरकारको आधिकारिक धारणा आएको पनि उनको भनाइ थियो ।
उनले भने, ‘नवनिर्मित भारतीय संसद् भवनमा राखिएको अखण्ड भारतको नक्सा मोरलमा सम्राट अशोकको समयमा साम्राज्यको फैलावट जनाइएको भनी नक्सामा लेखिएको र राजनीतिक विषय नभएको भनी भारत सरकारका तर्फबाट आधिकारिक धारणा भारतका विदेशमन्त्रीबाट आएको समितिलाई जानकारी गराउँछु ।’
