एजेन्सी । फरवार्डद्वय क्रिस्टियानो रोनाल्डो र एन्डर्सन टालिस्का चम्किदा अल नासरले साउदी प्रो लिगमा शानदार जीत निकालेको छ । मंगलबार राति भएको खेलमा अल नासरले अल अदालाहलाई ५-० गोलले पराजीत गरेको हो ।
प्रिन्स अब्दुलाह बिन जलावी स्पोर्ट्स सिटी स्टेडियममा भएको खेलमा अल नासरलाई जीत दिलाउन रोनाल्डो र टालिस्काले समान दुई-दुई गोल गर्दा अयमान अहमेदले एक गोल थपे । पहिलो हाफको ४० औं मिनेटमा रोनाल्डोले पेनाल्टीमा गोल गर्दै अल नासरलाई शुरुवाती अग्रता दिलाएका थिए । ५५ औं मिनेटमा अब्दुलेलाह अल अम्रीको पासमा टालिस्काले गोल गर्दै अल नासरको अग्रता दोब्बर बनाए ।
६६ औं मिनेटमा टालिस्काको पासमा रोनाल्डोले व्यक्तिगत दोस्रो गोल गर्दै अल नासरलाई फराकिलो जीततर्फ अगाडि बढाएका थिए । ७८ औं मिनेटमा अहमेदको पासमा टालिस्काले व्यक्तिगत दोस्रो गोल गर्दै अल नासरलाई ४-० गोलको अग्रता दिलाए । यस्तै दोस्रो हाफको इन्जुरी समयको आठौँ मिनेटमा अहमेदले गोल गर्दै अल नासरलाई ५-० गोलको जीत दिलाएका हुन् ।
जीतका बाबजुत अल नासर २२ खेलबाट ५२ अंक जोड्दै लिगको दोस्रो स्थानमा यथावत छ । समान खेलबाट १७ अंक जोडेको अल-अदालाह १४ औं स्थानमा रहेको छ ।
