काठमाडौं । सहिद स्मारक ए डिभिजन लिगको छैटौं चरणको खेलहरु आजबाट शुरु हुँदैछ । अन्तराष्ट्रिय ब्रेकपछि लिग आजबाट पुन शुरु हुन लागेको हो ।
आज हुने पहिलो खेलमा संकटा क्लब र फूटबल क्लब खुमलटार भिड्नेछन् । सातदोबाटोस्थित एन्फा कम्प्लेक्समा हुने खेल दिउँसो २ बजे शुरु हुनेछ । दुवै टोली आजको खेल जित्दै लिगमा आफ्नो स्थान सुधार गर्न चाहन्छन् । हाल संकटा पाँच खेलबाट ६ अंकको साथ आठौँ स्थानमा रहेको छ भने समान अंक जोडेको खुमलटार गोलअन्तरमा पछि रहँदै नवौं स्थानमा रहेको छ ।
यस्तै आजै हुने दोस्रो खेलमा दुई विभागीय टोली एपीएफ फूटबल क्लब र नेपाल पुलिस क्लब भिड्नेछन् । खेल च्यासल स्टेडियममा दिउँसो २ बजे हुनेछ । पुलिस आजको खेलमा पहिलो जीतको खोजीमा हुनेछ । पाचौं चरणसम्म खेल सकिंदा पुलिस जितविहिन रहँदै एक अंक जोड्दै लिगको पुछारमा छ । यस्तै पाँच खेलबाट ७ अंक जोडेको एपीएफ छैटौं स्थानमा रहेको छ ।
