सरकार बनाउन आफू एमाले खोज्दै बालकोट गएको होइनः प्रधानमन्त्री

काठमाडौं । प्रधानमन्त्री पुष्पकमल दाहाल प्रचण्डले सरकार बनाउन आफू एमाले खोज्दै नगएको बताएका छन् ।

सोमबार संसद बैठकमा आफूले मागेको विश्वासको मतमाथिको छलफलमा उठेका प्रश्नको जवाफ दिँदै प्रधानमन्त्रीले आफूले अन्तिम समयसम्म पनि १० पुसअघिकै गठबन्धनबाटै प्रधानमन्त्री हुन बल गरेको बताएका हुन् ।

उनले बरु एमाले नै आफूलाई खोज्दै आएको बताए । उनले भने, ‘म खोज्दै गएको होइन, तपाइँहरु खोज्दै आउनुभएको हो । त्यसबेला कांग्रेसलाई के भन्नुभयो ? अहिले सबै कुरा नभनौं । बरु मैले तपाइँलाई दुईपल्ट प्रधानमन्त्री बनाएको थिएँ, एउटा तिर्नुभयो एउटा अझै बाँकी छ ।’

उनले  यसबारे आफैंलाई प्रश्न गर्न एमाले उपाध्यक्ष विष्णु पौडेललाई आग्रह गरे । उनले भने, ‘यो प्रश्न आफैँलाई गर्नुस् किन यस्तो भयो भनेर । विष्णु पौडेलजी अर्थमन्त्री हुनुहुन्थ्यो उहाँलाई सबै जानकारी छ, किन भयो भन्ने कुरा आफैँलाई सोध्नुस् ।’

प्रधानमन्त्रीले एमाले अध्यक्ष केपी शर्मा ओलीले आफूलाई वैशाखसम्म सरकारबाट हटिसक्ने दाबी गरेको बताए । उनले ओलीले वैशाखसम्ममा आफू नेकपा एमालेसँगै राष्ट्रपतिको बाँयापट्टी लबिमा आइपुग्ने दाबी गरेको उल्लेख गर्दै त्यसको निर्णयको जिम्मा सांसदहरुलाई छोडेको बताए ।

उनले भने,’त्यतिबेला उहाँले तपाईं वैशाखभन्दा उता जानुहुन्न भन्नुभएको छ । उहाँले भनेका वैशाखमा राष्ट्रपतिको बाँयापट्टी लबिमा तपाईं र म एकैठाउँमा हुन्छौं भन्नुभएको छ । उहाँको भनाईलाई पुष्टि गर्ने कि हामीहरु सबैको हातमा छ ।’

Leave a Reply

Your email address will not be published. Required fields are marked *