काठमाडौं । नेपाली राष्ट्रिय फुटबल टिमका मुख्य प्रशिक्षक भिन्सेन्जो अल्बर्टो एनीसले आफ्नो नेतृत्वमा नेपाली टीमले राम्रो गर्ने विश्वास व्यक्त गरेका छन् ।
अखिल नेपाल फुटबल संघ (एन्फा) ले मंगलबार काठमाडौंमा आयोजना गरेको पत्रकार सम्मेलनमा उनले नेपाली टीममा निकै सम्भावना रहेको उल्लेख गर्दै आफ्नो नेतृत्वमा राम्रो गर्ने विश्वास व्यक्त गरे ।
नेपाली खेलाडीहरूका लागि अनुभव लिनु ठूलो चुनौती रहेको र अब नयाँ खेलाडी र नयाँ रणनीति निर्माण गर्नुपर्नेमा जोड दिए ।
नेपाली फुटबललाई सफल बनाउनका लागि खेलाडी नै मेहनत गर्नुपर्ने उनको भनाइ थियो । उनले आफ्नो एक वर्षमा जित नै मुख्य लक्ष्य भएको बताए । उनले आफूले नेपाली फुटबललाई २–३ वर्षबाट पछ्याएका कारण पनि निकै सम्भावना देखेको बताए ।
भिन्सेन्जोको नेतृत्वमा नेपालले प्रधानमन्त्री कप, थ्री नेसन्स कप फुटबल प्रतियोगिता खेल्नेछ । त्रिपुरेश्वरस्थित दशरथ रंगशालामा आयोजना हुने थ्री नेसन्स कप चैत ८ देखि १७ गतेसम्म हुनेछ । एन्फाले मुख्य प्रशिक्षक भिन्सेन्जोलाई एक वर्षको लागि नियुक्त गरेको हो ।
