एजेन्सी । बेल्जियन फरवार्ड लिएन्द्रो ट्रोसार्डले तीन एसिस्ट दिएको खेलमा इंग्लिस प्रिमियर लिगको शीर्ष स्थानमा रहेको आर्सनलले सहज जीत निकालेको छ । आइतबार राति भएको खेलमा फुल्हामलाई ३-० गोलले हराउँदै आर्सनलले लिगमा आफ्नो अग्रता बढाएको हो ।
क्राभन कटेजमा भएको खेलमा आर्सनललाई जीत दिलाउन गाब्रियल, गाब्रियल मार्टिनेली र मार्टिन ओडेगार्डले समान एक-एक गोल गरे । आर्सनलले पहिलो हाफमै तीन गोल गरेको हो । खेलको २१ औं मिनेटमा ट्रोसार्डको क्रसमा गाब्रियलले हेडर गोल गर्दै आर्सनललाई शुरुवाती अग्रता दिलाएका थिए ।
२६ औं मिनेटमा ट्रोसार्डकै क्रसमा मार्टिनेलीले हेडर गोल गर्दै आर्सनलको अग्रता दोब्बर बनाए । पहिलो हाफको इन्जुरी समयमा ट्रोसार्डकै पासमा ओडेगार्डले गोल गर्दै आर्सनललाई सहज स्थितिमा पुर्याएका थिए । दोस्रो हाफमा दुवै टोलीबाट थप गोल हुन नसक्दा आर्सनल ३-० गोलले विजयी भएको हो ।
जीतसँगै आर्सनल २७ खेलबाट ६६ अंक जोड्दै लिगको शीर्ष स्थानमा यथावत छ । समान खेलबाट ३९ अंक जोडेको फुल्हाम आठौँ स्थानमा रहेको छ ।
