काठमाडौं । एएफसी यु-२० महिला एसियन कप छनोटको पहिलो खेलमा नेपालले शानदार जीत निकालेको छ । बुधबार बेलुकी भएको खेलमा घरेलु टोली प्यालेस्टाइनलाई ६-० गोलले हराउँदै नेपालले छनोटमा उत्कृष्ट शुरुवात गरेको हो ।
फैजल अल हुसेनी अन्तराष्ट्रिय स्टेडियममा भएको खेलमा नेपाललाई जीत दिलाउन दीपा शाहीले चार गोल गर्दा गरिमा राईले दुई गोल गरिन् । नेपालले पहिलो हाफमा दुई र दोस्रो हाफमा चार गोल गरेको हो । दीपाले खेलको २१ औं, ६४ औं, ७५ औं र ८५ औं मिनेटमा गोल गरिन् । यस्तै गरिमाले २९ औं र ८३ औं मिनेटमा गोल गरिन् ।
जीतसँगै समूह ‘बी’मा नेपालले तीन अंक जोडेको छ । अब नेपालले दोस्रो खेल सोमबार नर्दन मारियानासँग खेल्नेछ । छनोटको समूह विजेता दोस्रो चरणका लागि छनोट हुनेछ ।
दोस्रो चरण जुन ३ देखि ११ सम्म हुनेछ । जसबाट उत्कृष्ट ४ टोलीले उज्वेकिस्तानमा हुने यू २० महिला एसियन कप खेल्नेछन् । उज्वेकिस्तानमा हुने यू २० महिला एसियन कप २०२४ को मार्च ३ देखि १६ सम्म हुनेछ । यू-२० महिला एसियन कपमा १६ टोलीले प्रतिस्पर्धा गर्नेछन् ।
तस्बिर- एनएसजेएफ
